Adam Price yn galw am ymgyrch IE yn ddioed

[aled g job]

Mae Adam Price, yn ei golofn yn Golwg heddiw, yn galw am sefydlu ymgyrch IE dros senedd i Gymru yn ddioed. Fel aelod cyffredin o Blaid Cymru, diolch byth ydi f'ymateb i. Dwi wedi bod yn bryderus iawn am y tawedogrwydd o gyfeiriad arweinyddiaeth PC ar fater refferendwm ar senedd lawn yn 2010- oedd, fe gofiwch, yn un o'r prif ddadleuon a gafwyd dros sefydlu clymblaid a'r Blaid Lafur y llynedd. Yr addewid a gafwyd gan arweinyddiaeth PC oedd y byddai'r Blaid Lafur nid yn unig yn cefnogi sefydlu refferendwm yn 2010 ond y bydde nhw hefyd yn ymgyrchu dros bleidlais IE. Ar y pryd, roeddwn i'n amheus iawn a fyddai'r Blaid Lafur yn cadw at yr elfen gyntaf o'r addewid honno, heb son am yr ail gymal a dwi'n meddwl bod y synau sy'n dod o'r Blaid Lafur dros y misoedd diwethaf yn cadarnhau'r gred honno. Dwi'n credu bod Adam Price heddiw yn tanlinellu'r pwynt sylfaenol hyn am anwadalwch a diffyg ymroddiad y Blaid Lafur ar y mater hwn, ac mae o mwy neu lai yn cydnabod bod rhaid i Blaid Cymru ddangos mwy o asgwrn cefn ac arweiniad os ydan ni am weld senedd lawn yng Nghymru.

O gofio hefyd bod David Davies Mynwy eisoes wedi cychwyn ar ymgyrch NA, a pherig gwirioneddol y bydd y gwrth-ddatganolwyr pellach yn achub y blaen ar bawb ac yn gosod yr agenda ar y mater hwn, pa reswm sydd dros oedi pellach mewn gwirionedd? Hefyd mae Syr Emyr Parry Jones wrthi'n trampio'r wlad ar hyn o bryd yn ceisio mesur y farn o blaid rhagor o rymoedd i'r Cynulliad: ond sut ar wyneb y ddaear mae disgwyl i bobl ymateb i'w genhadaeth o heb fod ein plaid genedlaethol yn gosod y dadleuon gerbron y cyhoedd?

Hyd yn oed pe na bai modd cynnal y refferendwm yn 2010, byddwn i'n dadlau bod hi'n hen bryd gweld ymgyrch IE ar waith. Yn yr Alban, roedd yna Gonfensiwn Cenedlaethol wedi'i sefydlu i gyflwyno dadleuon o blaid senedd i'r Alban- a hynny 5 MLYNEDD cyn y bleidlais dyngedfennol nol yn 1997.

Mae llwyddiant Barack Obama yn Yr UDA wedi dangos pwysigrwydd ymgyrchu ar lawr gwlad a thynnu gwirfoddolwyr i mewn i'r broses wleidyddol ar y lefel leol; a dwi'n mawr obeithio mai dyna'r trywydd y bydd PC yn ei ddilyn mewn ymgyrch dros Senedd lawn. Hynny yw, mae angen ymgyrch sydd yn mynd y tu hwnt i ffiniau pleidiol traddodiadol gan dynnu miloedd o bobl i gyfrannu at yr ymgyrch.

[Hogyn o Rachub]

Ow, a finna'n meddwl bod hwnnw'n darllen "Adam Price yn galw am ymgyrch IE yn ei ddiod"

Dwi'n cytuno efo popeth ti'n ei ddweud, ond hefyd byddwn i'n ategu mai dyma'r adeg berffaith i Blaid Cymru (a'r Democratiaid Rhyddfrydol o ran hynny) fod yn rhan o ymgyrch o'r fath a chyflwyno dadleuon o safbwynt pleidiol: wedi'r cyfan, ni all y Ceidwadwyr na'r Blaid Lafur wneud hyn ar hyn o bryd o ystyried y rhwygiadau amlwg sydd yn y ddwy blaid ar ddatganoli, ac o'r herwydd bydd y gwrthwynebiad yn wan.

Mae hefyd yn bwysig oherwydd, fel y dywedaist, mae'n edrych yn gynyddol debyg bod Llafur, neu yn sicr elfennau o'r blaid Lafur, am gefnu ar ei haddewid i gefnogi refferendwm. Rhaid ceisio creu sefyllfa lle byddai'n annoeth yn wleidyddol i unrhyw blaid wrthwynebu datganoli pellach os mae'n bosibl.

[Seonaidh/Sioni]

Wel, rhaid cyfadde nad ydw i ddim yn cefnogi refferendwm ar senedd Cymru. Mae'r mwyafrif helaeth o bobl Cymru wedi ethol pleidiau (Llafur, PC, Rhyd-Dem) sy'n cefnogi senedd i Gymru - dylai ddigwydd heb eisiau refferendwm.

Bu refferendwm ar senedd i'r Alban - cafodd o fwyafrif da. Bu refferendwm ar ryw fath o hanner-ddatganoli i Gymru - dim ond mwyafrif bach iawn gafodd o. Bu refferendwm ar chwarter-ddatganoli i G-Ddn. Lloegr - methodd. Os dych chi'n cynnig y peth go iawn, bydd pobl yn ei gefnogi. Os dych chi'n cynnig rhywbeth llai, wel, efallai bydd digon o gefnogaeth, efallai na bydd. Dim ond cywirio'r sefyllfa sy eisiau rwan - troi'r "Cynulliad" yn senedd go iawn - pa raid refferendwm o gwbl?

Ond, oni fydd dim yn digwydd heb refferendwm, wel, rhaid sicrhau pleidlais IE. Mae'n gas gen i refferenda oherwydd pwer y cyfryngau torfol a'r vested interests sy'n eu rheoli.