gan aled g job » Llun 14 Medi 2009 8:39 am
Mae'r papurau a'r cyfryngau wedi rhoi cryn sylw i araith Adam Price ddydd Sadwrn a ffyrnigrwydd ei ymosodiad ar y Ceidwadwyr o berspectif hanesyddol a pherspectif cyfoes. Rhaid dweud ei bod hi'n araith feistrolgar ganddo, yn cyfuno hanes, diwylliant a gwleidyddiaeth mewn ffordd cwbl wefreiddiol. Fedrai i ddim meddwl am unrhyw wleidydd cyfoes yng Nghymru nag yng ngweddill Gwledydd Prydain o ran hynny sy'n gallu areithio yn y ffasiwn fodd. Ond imi, roedd hi'n araith strategol glyfar hefyd, gan y gellid ei chrynhoi mewn dau air Saesneg-"Tough Love". Mae Adam Price yn gwybod y bydd rhaid i Plaid Cymru reoli hefo'r Ceidwadwyr yng Nghymru rol etholiadau 2011, ond roedd ei araith yn dweud i bob pwrpas cymaint y mae'n rhaid i'r Toriaid newid eto cyn y gall hynny ddigwydd. Er fod Cameron yn gwneud job dda o ran "dad-lygru'r" brand Ceidwadol yn Lloegr, pwynt Adam Price oedd bod rhaid i'r Ceidwadwyr Cymreig wneud llawer mwy eto i "ddad-lygru'r" brand yma yng Nghymru a phrofi i bobl Cymru eu bod nhw'n haeddu'r cyfle i rannu grym, os y daw hi i hynny. Mae'r her wedi'i gosod a does ond gobeithio y gwnaiff y Ceidwadwyr Cymreig ymateb iddo a dangos bod ganddyn nhw agenda genedlaethol Gymreig gredadwy. Ar yr un gwynt, roedd ei gydnabyddiaeth bod lle i geidwadaeth hefo "c" fechan yng ngwleidyddiaeth Cymru, ac felly yng ngwleidyddiaeth y Blaid, hefyd yn strategol glyfar o ran yr etholwyr yn gyffredinol. Mae yna filoedd ar filoedd o bleidleiswyr Cymreig y gellid eu disgrifio fel Ceidwadwyr hefo "C" fechan, ac fe all cydnabod bodolaeth y rhain fod yn arf etholiadol bwysig mewn sawl ardal wledig yn 2010 a 2011.
Aled G Job