Sori am deitl yr edefyn, ond dwi am i hwn ymddangos yn uchel yn y peiriannau chwilio dan yr allweddeiriau perthnasol os yn bosibl.
Dros yr wythnosau/misoedd diwethaf mae sawl un wedi gofyn am y ffeiliau iaith Gymraeg ar gyfer phpBB, sef y meddalwedd sy'n rhedeg maes-e, a dwi wedi eu danfon ymlaen trwy ebost wrth gwrs. Er mwyn ei wneud yn haws, dwi nawr wedi gosod rhain ar y we fel bod modd i unrhywun ei lawrlwytho yn hawdd. Pwysa ar y ddolen isod i'w lawrlwytho:
Ffeiliau Iaith Gymraeg phpBB3 - http://www.gwynfor.net/phpbb3-cy.zip
Cwpwl o bethau.
Mae'r ffeiliau uchod yn gymysgedd o'r ffeiliau iaith gwreiddiol cafodd eu cyfieithu gan Nic Dafis a'r criw ar gyfer phpBB2, peth gwaith gan Barbarella i'w diweddaru i phpbb3 a wedyn fy ngwaith i yn gorffen y diweddaru, a gwaith Maredudd ap Gwyndaf yn cywiro'r gwallau wnes i yn y cod! .
Mae peth gwallau iaith yno yn sicr, ac mae rhai ffeiliau heb gael eu cyfieithu'n llawn (yn enwedig y rhai tu ôl y llen.)
Hefyd, mae angen bod yn ofalus gan fod y cod wedi cael ei 'hacio' mewn ambell i le ar gyfer maes-e yn benodol (cyn fy amser i ). Dylid cymharu'r fersiynau Cymraeg yma gyda'r fersiwn Saesneg phpbb3 i wneud yn siwr nad oes rhai llinellau ar goll cyn cychwyn ar unrhyw waith o gywiro neu gyfieithu o'r newydd.
Roeddwn am uwchlwytho'r ffeiliau iaith yma i wefan phpbb fel cyfieithiad swyddogol, ond heb wneud gan eu bod yn anghyflawn. Os oes unrhywun yn cwblhau'r gwaith cyfieithu ac yn cywiro unrhyw gamgymeriadau, rhowch wybod.