Gwarth llwyr
Bu i Blair ddatgan yn y senedd cyn rhyfel Irac y gallai Saddam a Irac gynhyrchu arfau dinistriol (hyd yn oed niwclear) - biolegol a chemegol, o fewn 45 munud.
Bu i hyn ennill nifer o ASau drosodd, ac mi gefnogon nhw'r rhyfel.
Ond yn ddiweddar mae Jack Straw wedi datgan nad arfau o ddinistr enbyd yw'r peth pwysicaf, ac o bosib na fyddan nhw'n cael eu darganfod - symud y golposts yn llwyr.
A NAWR ma' Donald Rumsfeld, Ysgrifennydd amddiffyn y UDA wedi awgrymu efallai fod holl arfau dinistriol Irac wedi cael eu dinistrio cyn i'r rhyfel ddechrau!
i) Byddai dinistrio unrhyw arf cyn mynd i ryfel yn beth dwl iawn i arweinydd milwrol ei wneud - pam byddai Saddam am ddinistrio ei arfau?
ii) os y bu iddo ddinistrio'r arfau pam y bu i luoedd America, Prydain ac Awstralia fynd i fewn i Irac i ryfel?
Mae'n hollol warthus - mae'n rhaid mynd a Bush a Blair o flaen llys rhyngwladol am droseddau yn erbyn dynoliaeth!
Mae llywodraeth Prydain ac America bellach hefyd yn cyfaddef iddyn nhw ddefnyddio 'cluster bombs' yn Irac - a'r rhain mewn ardaloedd trefol a phoblog! (mae 16% o 'bomblets' y bomiau yma yn aros ar y llawr heb ffrwydro tan fod rhywun - diniwed fel arfer - yn sefyll arno).
Ar y radio bore yma ceisiodd gweinidog y lluoedd arfog Prydeinig amddiffyn y defnydd o'r bomiau yma. Dywedodd fod yn rhaid iddyn nhw eu defnyddio yn y trefi achos ffordd arall byddai 'ein milwyr ni' wedi cael eu ymosod a'u lladd gan luoedd Irac - ac ni fyddai hynny'n dderbyniol.
Wel, esgusodwch fi, ond milwyr yw'r rhain sydd wedi dewis o'u gwirfodd i ymuno a'r lluoedd arfog sydd, fel rhan o'u dyletswyddau, yn gorfod mynd i ryfel - a'r tro diwethaf i mi sieco roedd milwyr yn dueddol o gael eu lladd mewn rhyfel. Hyn yn hollol wahanol i bobl ddiniwed Irac oedd a dim dewis o gwbwl i optio allan o'r holl beth - a nhw heddiw, yn blant, yn famau, yn dadau ac yn henoed, sy'n sefyll ar y 'bomblets' dieflig yma sy'n wasgar ar hyd Irac - nhw sy'n cael eu lladd gan WMD Prydain, ac sydd heb y triniaeth na'r meddyginiaeth na'r cyfarpar addas i ymdopi a chanlyniadau'r 'bomblets'!. Ond yn ol y Gweinidog y Lluoedd Arfog mae hyn yn dderbyniol!
Mae hyn yn ffiaidd - hollol ffiaidd.