Ffordd Ddeuol o'r Gogledd i'r De

gan **mred** » Llun 24 Tach 2003 6:51 pm

A oes angen adeiladu ffordd ddeuol newydd o'r gogledd i'r de, ac ar hyd pa lwybr? Neu a oes gormod o fuddsoddi mewn ffyrdd?

A fyddai'n well ailagor y darnau hynny o'r rhwydwaith rheilffyrdd a gaewyd, e.e.Bangor/Caernarfon/Bryncir, i greu cyswllt trên i lawr ochor orllewinol y wlad?

gan **Geraint** » Llun 24 Tach 2003 7:00 pm

Un anodd. Falle bydde ffordd newydd yn economegol dda i Gymru, cysylltiadau gwell rhwng De ar Gogledd, hawsach lledu swyddi o Gaerdydd efallai.

Ond, dwi di dreifio Caerdydd i'r Gogledd llawer gwaith. Dydi hi ddim yn ddrwg o gwbl, ma na ddigon o strets i allu pasio pethau araf os da chi'n nabod y ffordd. Ac mae hi yn daith STYNING! Y wlad mor brydferth, bydde ni ddim yn hoffi gweld craith mawr yn cael ei rhoi lawr ei chanol. Hefyd, mae'r A55 a'r M4 wedi cael effaith mawr a'r gymunedau gwledig, be fyddau effaith ffordd ddeuol o'r gogledd i'r de? MacDonalds yn Llanbrynmair?

Na be ydi fy nheimladau off top fy mhen, be di'r dadlau o blaid?

gan **mred** » Llun 24 Tach 2003 8:58 pm

Mae'n siŵr mai'r ddadl o blaid ydi y byddai'n fodd o greu mwy o undod ar adeg o ddatganoli ac ailsefydlu Cymru fel cenedl yn weinyddol yn ogystal ag yn ysbrydol. Yng Nghymru a gwledydd di-wladwriaeth eraill megis Llydaw, mae ffurf y rhwydwaith ffyrdd yn aml yn erfyn gwleidyddol i'w clymu i'r canol economaidd a gweinyddol.

Mae hefyd yn gredo ddi-ysgog gan wleidyddion confensiynol bod ffyrdd yn fodd o gryfhau'r economi leol, er nad yw esiamplau Lerpwl a Newcastle ar Dain yn ategu'r syniad yma o gwbl.

Ond fel tithau ella, dwi'n poeni ynglŷn ag effaith rhagor o wella ar y llwybr o'r Gogledd i'r De (sydd yn dal i ddigwydd), ar sawl cyfrif. Yn amgylcheddol, y modd y byddai'n sbarduno mwy o ddefnydd ar geir, datblygiad anghymesur a fyddai'n niweidiol i'n cymunedau, a'r gallu i ganoli gwasanaethau a siopau ymhellach fyth o'r gymuned, ond gan hefyd ddi-freintio fwyfwy y garfan honno o'r gymdeithas nad oes ganddi gludiant preifat.

Dydi adeiladu mwy o ffyrdd ddim yn gyson ag egwyddor sylfaenol y Cynulliad Cenedlaethol o sicrhau Cymru gynaliadwy. Byddwn i'n dadlau mai datblygu'r rhwydwaith rheilffyrdd a chludiant cyhoeddus yw'r ffordd ymlaen.

gan **Cardi Bach** » Maw 25 Tach 2003 10:06 am

Ma honna i weld yn un anodd.

Tra ar yr un llaw, yn y tymor byr (20 mlynedd dyweder) ma ymestyn yr hewl o'r de i'r gogledd i weld fel opsiwn da - byddai'n golygu cyswllt haws ar gyfer buddsoddi mewn ardaloedd gwledig, yn enwedig yng Nghanolbarth Cymru, haws cario 'bulk' i ganolfannau llai, cyswllt gwaith haws, h.y. i bob pwrpas bydd yn datblygu'r economi - ar y llaw arall, wrth wneud hyn, bron yn anochel ddywedwn i, bydd angen ymestyn yr hewl ymhellach mewn ugain mlynedd i gynnal y tyfiant. Yn y tymor hir felly, nid yn unig fod hyn dipyn yn waeth i'r amgylchedd, ond y gwir yw y bydd hi'n haws 'comiwto' I Gaerdydd a Chasnewydd a'r De Ddwyrain o lefydd fel Aberhonddu, - ai llesol i economi gwledig canolbarth Cymru fyddai hyn? Fi'n amau - yn y bon atgyfnerthu economi'r de ddwyrain fyddai hyn yn wneud. Gan fod Caerdydd yn ganolfan siopa i bobl o bob cwr o Dde/Gorllewin/Canolbarth Cymru bellach, byddai hyn yn golygu fwy o siopwyr yno a mwy o arian yn mynd i'r economi yno, ac allan o economi y llefydd tlotach - sydd yn 'cownter-prodyctif' wrth gwrs.

Ar y foment hon mewn amser, fi'n dueddol o gydymdeimlo fwy gyda'r syniad o ail agor y rheilffyrdd, a sicrhau fod tren cyson yn mynd o Gaerdydd i Aber i Fangor fydd yn cario bylc, ac yn cymryd ddim fwy na 5 stop ar y daith. Golyga hyn dren cyson i Fangor o Gaerdydd fydd yn cymryd rhai oriau yn unig. wrth gwrs dyw hyn ddim yn realistig eto - dyw'r rhwydwaith ddim yn bodoli - ond dyna'r math o beth sydd angen (weden i nawr) :winc:

gan **Garnet Bowen** » Maw 25 Tach 2003 10:25 am

Mae 'na ryw lun ar drafodaeth o drafnidiaeth gyhoeddus yn y Gymru wledig wedi bod mewn edefyn arall. Tra mod i'n credu ei bod hi'n anymarferol cynnal gwasanaeth trafnidiaeth cyhoeddus lleol, dwi yn meddwl ei bod hi'n holl bwysig fod yna wasanaeth trenau call rhwng gogledd a de Cymru. Ond, mi ydw i hefyd yn meddwl ei bod hi'n anorfod y bydd rhaid ehangu'r A470.

Dwi'n meddwl fod y pwynt wnaed gan Mred yn un holl bwysig - fod ffordd rhwng gogledd a de Cymru yn hanfodol i unrhyw ymgais i lunio hunaniaeth genedlaethol. Efallai fod y siwrnae rwan yn un brydferth, ond mae hi'n gwbwl anymarferol.

Ella mod i'n un-llygeidiog ynglyn a hyn, oherwydd y gogledd-orllewin fyddai'n manteisio o gael ffordd dda. Dwi'n credu'n gryf fod angen datblygu economi Gwynedd, er mwyn sichrau parhad y Gymraeg. Fy mreuddwyd i ydi gweld Caernarfon yn cael ei throi yn ganolfan drefol ffynianus, lle mae pobl eisiau gweithio a byw. Ond ar y funud, mae hi'n anodd iawn cael sefydliadau Caerdydd i gymeryd y rhan yma o'r wlad o ddifrif. Wrth greu ffordd newydd rhwng gogledd a de, mi fyddai posib atgyfnerthu'r cysylltiadau rhwng Caerdydd a Chaernarfon, gan ddod a'r Gymru Gymraeg yn ol i ganol bywyd Cymru.

gan **Hedd Gwynfor** » Maw 25 Tach 2003 10:59 am

Rhaid ail agor y rheilffordd rhwng Caerfyrddin a Aberystwyth! Fi'n timlo'n gryf iawn am hyn, rhywyn arall ishe helpu trefnu ymgyrch? Odd yr hen rheilffordd yn mynd reit tu ol ti fy rhieni. Yn wir roedd ein sieds ni yn rhan o'r Orsaf! Y peth gwaethaf oedd fod y stretch rhwng Caerfyrddin a Aber yn gwneud llawer o elw! On i'n siarad gyda un o brothorion Pantycelyn blynyddoedd yn ol, ac odd e wedi bod yn gwneud ymchwil i'r llywodraeth yn ystod i'r 80au i'r posibilrwydd o'i ail agor. Rodd e'n ei weld yn bosibiliad - er yn amlwg byddai angen i'r tren newid ei ffordd rhyw ychydig - mae tai ar y trac tu ol i dy fy rhieni erbyn hyn.

O beth i fi'n deall mae modd mynd ar dren o Aber wedyn i Fangor, jest bod angen mynd ar dren bach, ydy hyn yn iawn? Byddai tren cyflym o Gaerdydd i Fangor yn wych. Efallai yn aros stopio yn y mannau yma'n unig - Caerdydd > Abertawe > Caerfyrddin > Llanbed > Aberystwyth > Caernarfon > Bangor

Fi ddim yn poeni llawer am hewlydd i ddweud y gwir gan mod i ddim yn gyrru, ac yn debyg i nifer o bobl eraill fi ddim am weld craith anferth yn mynd trwy ganol Cymru, ond mae yna ddadl dros welliannau, ac efallai ychwanegu lon i nifer o hewlydd (yn enwedig yr un sy'n mynd lan y rhiw yn Alltwalis!

gan **Garnet Bowen** » Maw 25 Tach 2003 11:21 am

Hedd Gwynfor a ddywedodd:Fi ddim yn poeni llawer am hewlydd i ddweud y gwir gan mod i ddim yn gyrru, ac yn debyg i nifer o bobl eraill fi ddim am weld craith anferth yn mynd trwy ganol Cymru, ond mae yna ddadl dros welliannau, ac efallai ychwanegu lon i nifer o hewlydd (yn enwedig yr un sy'n mynd lan y rhiw yn Alltwalis!

Ehangu'r A470 sydd ei angen, yn hytrach nac adeiladu lon newydd. Dwi yn gyndyn o gefnogi adeiladu ffyrdd newydd, ond mi ydw i'n meddwl fod yr angen yn un dirfawr. Chwarae teg i chdi am beidio gyrru, ond mi wyt ti mewn lleiafrif. Mae'r rhan fwyaf o bobl Cymru yn defnyddio eu ceir, ac yn debygol o ddewis gwneud hynnu, hyd yn oed pan mae 'na wasanaeth tren call i'w gael. Fedrwn ni ddim fforddio eu hanwybyddu nhw.

gan **Cynog** » Maw 25 Tach 2003 1:19 pm

TREN, TREN, TREN, TREN, TREN, TRENTREN, TREN, TREN, TREN, TREN, TREN. tren!

gan **Newt Gingrich** » Mer 26 Tach 2003 12:52 am

Oes yna unrhyw gyfiawnhad mewn datblygu ffordd sydd, ac eithrio wythnos y sioe, yn dawel ac yn hawdd ei thrafeilio?

Dwsi di bod yn teithio fyny a lawr yn gyson, prin fod C'fon - Caerdydd yn fwy na 3 awr a hanner. Am 180 milltir mae hyn yn dda iawn.

Iawn, os oes rhaid fe ellir gwella ambell ran i'r ffordd, ond does dim cyfiawnhad economaidd nac ychwaith amgylcheddol dros ddatblygiad sylweddol o'r A470.

gan **Garnet Bowen** » Mer 26 Tach 2003 9:18 am

Newt Gingrich a ddywedodd:Oes yna unrhyw gyfiawnhad mewn datblygu ffordd sydd, ac eithrio wythnos y sioe, yn dawel ac yn hawdd ei thrafeilio?

Dwsi di bod yn teithio fyny a lawr yn gyson, prin fod C'fon - Caerdydd yn fwy na 3 awr a hanner. Am 180 milltir mae hyn yn dda iawn.

Iawn, os oes rhaid fe ellir gwella ambell ran i'r ffordd, ond does dim cyfiawnhad economaidd nac ychwaith amgylcheddol dros ddatblygiad sylweddol o'r A470.

Wyt ti o ddifrif? Dwi ddim yn meddwl mod i erioed wedi gwneud y daith o Gaernarfod i Gaerdydd mewn llai na 4 awr, ac yn aml iawn mae hi'n medru bod yn agos at 5.

Dwi'n ail-ddeud fy hun rwan, ond mater o hunaniaeth Gymraeg ydi datblygu'r A470. Byddai hi'n haws teithio rhwng Caerdydd, ein brifddinas, a'r fro Gymraeg draddodiadol. Byddai hyn yn ei gwneud hi'n ymarferol i ni ddatganoli rhagor o'r gwasanaethau cyhoeddus i fyny i'r gogledd a'r gorllewin.

Ffordd Ddeuol o'r Gogledd i'r De

Ffordd Ddeuol o'r Gogledd i'r De

Pwy sydd ar-lein