Iolo Williams ai sylwadau ar ffermio

gan **Geraint** » Maw 13 Ebr 2004 2:29 pm

Mae ffermwyr yn cael lot o bres am gael tyrbein ar eu tir. Diwedd y dydd busnes ydy fferm a dyna sut neith o rhedeg fo, mae'r ffarmwr yn mynd i wneud be mae o'n gallu i wneud elw.

Dwi ddim yn amddiffyn y ffordd mae'r diwydiant yn gweithio, ond mae'n anheg barnu yn erbyn ffermwyr achos cwpl o achosion, a storiau. Ma na fobl allan i dwyllo'r sustem ymhob fusnes.

gan **Chwadan** » Maw 13 Ebr 2004 2:37 pm

Dwi'n nabod ffarmwr sy'n byw efo'i deulu mewn tyddyn ar fferm gownsil fach. Dwi'n byw wrth yml rhai o'i gaea fo, a mae o am adeiladu hyd at 5 o dai mewn un cae, gan ddifetha golygfa a gerddi nifer o dai eraill a gneud bom iddo fo'i hun. Ma'n hollol amlwg ei fod o'n sgrownjan gan y Cyngor ac eto mi neith y tai yma werthu am £100-£200 mil yr un a doedd dim rhaid iddo fo dalu am y plot hyd yn oed :ofn:

Ar y llaw arall, ma'r rhan fwya o ffermwyr dwi'n nabod yn sgrownjan dipyn llai na lot fawr o bobl. Fedrwch chi'm gwadu fod angen gneud wbath efo'r holl dir mynydd sydd yng Nghymru ac mae angen amaethyddiaeth felly pam ddim rhoi grantiau ayyb iddyn nhw? Llawn gwell rhoi grantiau i ffermwyr nac i bobl sy'n licio byw ar y dôl. Mae brawd mam yn byw mewn tyddyn bach sydd â thair llofft efo'i wraig a 4 o blant - 16 milltir o'r siop agosaf. Dydi eu bywyd nhw ddim yn foethus o bell ffordd a fasa lot o bobl ddim isho byw yn rwla mor unig gan orfod gweithio ddydd a nos i gynnal teulu (mae fy yncl yn tyfu barf gan nad oes ganddo fo amser i shafio :ofn:

). Ma na lot o deuluoedd mewn sefyllfaoedd tebyg iddyn nhw o gwmpas fan hyn. Ella fod ffermydd mawr sy'n mas-gynhyrchu gwartheg a chnydau yn gneud drwg i'r amgylchedd, ond weles i erioed hynny'n digwydd ym Meirionnydd.

gan **Garnet Bowen** » Maw 04 Mai 2004 4:25 pm

Chwadan a ddywedodd:Ar y llaw arall, ma'r rhan fwya o ffermwyr dwi'n nabod yn sgrownjan dipyn llai na lot fawr o bobl.

Mae pob un o drigolion yr Undeb Ewropeaidd yn talu tua £16 yr wythnos i gynnal ffermwyr yr undeb.

gan **Chwadan** » Maw 04 Mai 2004 4:31 pm

Garnet Bowen a ddywedodd:
Chwadan a ddywedodd:Ar y llaw arall, ma'r rhan fwya o ffermwyr dwi'n nabod yn sgrownjan dipyn llai na lot fawr o bobl.

Mae pob un o drigolion yr Undeb Ewropeaidd yn talu tua £16 yr wythnos i gynnal ffermwyr yr undeb.

Ac ma genna ni ddigon o fwyd lly paid a chwyno :winc:

gan **Kempes** » Maw 04 Mai 2004 4:34 pm

Roedd fy nhad yng nghyfraith yn ffermio ac yn gorfod gweithio llawn amser yn gwneud odd-jobs i ffermwyr/cymdogion eraill er mwyn cadw dau pen llinyn ynghyd.

Yn anffodus bu farw'n gymharol ifanc a dwi'n siwr fod yr holl stress o dalu biliau ynghyd â biwrocratiaeth sydd yn ymwneud â ffermio wedi dweud arno.

gan **Gwyddno** » Sul 09 Mai 2004 9:34 pm

Garnet Bowen a ddywedodd: Mae pob un o drigolion yr Undeb Ewropeaidd yn talu tua £16 yr wythnos i gynnal ffermwyr yr undeb.

O'r hyn rwy'n ei ddeall - dwi ddim yn ffermwr felly cael hyn yn ail law ydw i - pe bai'r archfarchnadoedd yn talu pris tecach i'r ffermwyr am eu cynnyrch (a dwi ddim yn sôn am dorri'r banc - mae Tesco yn gwneud miliynau o bunnau o elw bob dydd yn ôl eu canlyniadau diweddara'), efallai na fyddai'n rhaid i'r UE dalu cymaint mewn sybsidïau a'r Llywodraeth mewn Cymhorthdal Incwm iddyn nhw, byddai'n bosibl gwneud bywoliaeth (nid elw ffantastig, ond bywoliaeth fel pawb arall) a gwarchod yr amgylchedd ar yr un pryd.

Soniodd rhywun am fagiau plastig: ie, cytuno'n llwyr, gwaith y diafol yn nhw, nhw a byrnau mawr (y big bêls) o silwair (sy'n stwff digon ffiaidd beth bynnag).

Mae'n rhaid i'r diwydiant amaeth gael torri'n rhydd o'r syinad ma fod yn rhaid cynhyrchu'r mwya' gallan nhw. Roedd hynny'n iawn yn y '40au a'r '50au yn syth ar ol y rhyfel ond does dim o'i angen e nawr.

Yn olaf, rwy'n addo, y myth fod ffermwyr yn gyfoethog (fel dwedais i, nid ffermwr ydw i). Ydyn, maen nhw'n gyrru cerbydau 4x4 drudfawr a tractorau mawr sy'n costi 20 mil yr un a combeins sy'n costi Duw a wyr faint, ond dyna offer eu gwaith. Yn yr un ffordd a byddech chi neu fi yn cael HP i brynnu car newydd, maen nhw hefyd yn cael HP, ac yn ailforgeisio'u ffermydd ac yn mynd heb wyliau am flynyddoedd lawer er mwyn fforddio talu am y cerbydau angenrheidiol hyn a phrynu dillad ysgol i'r plant, bwyd i'r teulu, ac yn y blaen ac yn y blaen.

Pe bai ffermwr yn gwerthu'r fferm a'r holl offer a chyfarpar byddai gyda fe gannoedd o filoedd o bunnau a dim un man i fyw a dim gwaith. Pa les wnelai hynny i neb?

gan **LowRob** » Maw 08 Meh 2004 3:17 pm

Yn olaf, rwy'n addo, y myth fod ffermwyr yn gyfoethog (fel dwedais i, nid ffermwr ydw i). Ydyn, maen nhw'n gyrru cerbydau 4x4 drudfawr a tractorau mawr sy'n costi 20 mil yr un a combeins sy'n costi Duw a wyr faint, ond dyna offer eu gwaith. Yn yr un ffordd a byddech chi neu fi yn cael HP i brynnu car newydd, maen nhw hefyd yn cael HP, ac yn ailforgeisio'u ffermydd ac yn mynd heb wyliau am flynyddoedd lawer er mwyn fforddio talu am y cerbydau angenrheidiol hyn a phrynu dillad ysgol i'r plant, bwyd i'r teulu, ac yn y blaen ac yn y blaen

O'r diwedd, rhywun sy'n siarad yn gall! Mae'n amlwg nad oes unrhyw glem gan bawb arall sut fath o fywyd sydd gan ffermwyr Cymru, a pha mor galed mae nhw'n gweithio i roi bwyd ar ein byrddau. Hefyd, os na fyddai ffermwyr yn gofalu am gefn gwlad, fel cynllun Tir Gofal, anialwch fyddai cefn gwlad Cymru, yn rhy wyllt i unrhyw un mynd yn agos ati. Felly peidiwch â bod mor barod i feirniadu ein ffermwyr!
Cofiwch mai busnes yw amaethyddiaeth, ond yn wahanol i'r rhan fwyaf o fusnesau eraill, mae'n ffordd o fyw. A dweud y gwir, dwi wedi fy nghythruddo gymaint gan y sylwadau yma, well imi stopio, cyn imi ypsetio go iawn. :crio:

gan **Garnet Bowen** » Mer 09 Meh 2004 8:00 am

LowRob a ddywedodd:Cofiwch mai busnes yw amaethyddiaeth, ond yn wahanol i'r rhan fwyaf o fusnesau eraill, mae'n ffordd o fyw. A dweud y gwir, dwi wedi fy nghythruddo gymaint gan y sylwadau yma, well imi stopio, cyn imi ypsetio go iawn.

Sori i dy ypsetio di, ond toes gen i ddim llawer o gyd-ymdeimlad efo'r ddadl yma fod ffermio yn ffordd o fyw. Busnes a dim arall ydi amaeth. Ac ar y funud, mae o'n fusnes sydd yn methu sefyll ar ei draed ei hun. Pam felly y dylia'r llywodraeth ei gynnal, yn enwedig pan fo hynny'n arwain at newyn yn y trydydd byd?

gan **LowRob** » Mer 09 Meh 2004 11:36 am

Wrth gwrs mai ffordd o fyw yw ffermio, yn ogystal â busnes. Ym mha fusnes arall byddai'r perchennog yn aros i fyny bob nos am fisoedd oherwydd bod defaid yn cael wyn bach a gwartheg yn cael lloi? Ym mha fusnes arall byddai teulu'r perchennog yn mynd heb wyliau am flynyddoedd oherwydd bod hi'n amser cynhaeaf gwair pan fydd hi'n gwyliau haf? Ym mha fusnes arall byddai'r perchennog yn gorfod dioddef y fath beirniadu o du 'amgylcheddwyr' a 'phobl sy'n gwybod popeth'. Ffordd o fyw yw ffermio. Un o'r ffyrdd hyfrytaf o fyw hefyd yn fy marn i - codi efo'r gwawr a chysgu efo'r machlud.
Mae'n amlwg imi bod rhyw agwedd yn bodoli ymysg pobl erbyn hyn ein bod 'ni'n well na'r ffermwyr'. Hy! Efallai petai pawb yn cefnogi'r ffermwyr trwy brynu eu cynnyrch lleol yn hytrach na pethau afiach wedi'u mewnforio ni fyddai'n rhaid i bawb cynnal y diwydiant hwn?

gan **S.W.** » Mer 09 Meh 2004 11:53 am

Dwin gwbod fod ffermwyr mewn problemau enbyd - mae Brynle yn atgoffa ni i gyd digon aml! Y broblem ydy bod POB ffarmwr yn honi tlodi, pan mae nifer helaeth yn gyfoethog iawn.

Ym mha fusnes arall byddai'r perchennog yn gorfod dioddef y fath beirniadu o du 'amgylcheddwyr' a 'phobl sy'n gwybod popeth'.

Un o'r problemau mwyaf sydd gennai gyda ffermwyr ydy bod gan lawer agweddau mor negyddol tuag at yr amgylchedd. Mae ffermwyr yn dibynnu ar yr amgylchedd, ond serch hynny yn gweld llosgi teiars, gollwng bareli cemegion i fewn i afonydd, a rhwygo gwrychoedd allan ermwyn arian yn beth iawn iw wneud.

Mae pob diwydiant gyda rhan gorfod cymryd sylw o'r amgychedd, a ni ddylai ffermwyr fod yn wahanol!

Iolo Williams ai sylwadau ar ffermio

Pwy sydd ar-lein