Ar gyfer pwy mae angladd?

[Dylan]

Dydw i ddim yn grefyddol o gwbl, felly yn hynny o beth ni fyddaf yn dymuno gwasanaeth grefyddol yn fy angladd i.

Eto i gyd, onid er diben y sawl fyddai'n galaru amdana i (gan gymryd bydd rhywun yn rhywle yn gweld fy ngholli) y byddai'r angladd i fod?

hynny ydi, y cwestiwn ydi os ydi'r rhan fwya o'r galarwyr am weld isio angladd grefyddol, pwy ydw i i wrthwynebu? Os ydi o'n gysur iddyn nhw, hwre? Ddim fel petai bydd gen i fawr o ots am y peth. Fydda i 'di marw!

ond i gynnig ateb, dw i dal am fod yn styfnig a mynnu gwasanaeth seciwlar be bynnag. Hunanol? Wel fy angladd i fyddai o wedi'r cyfan, a dw i ddim yn meddwl mod i'n dymuno i grefydd baentio'r modd y bydd pobl yn cofio amdana i. A be bynnag dydi fy nheulu i ddim yn arbennig o grefyddol. Ond i'r anghredinwyr sy'n leisiau unig mewn teuluoedd ffyddlon, mae'n siwr ei fod yn gwestiwn mwy dyrys.

[sian]

Mm - gweld dy bwynt di.

Ar yr un llinellau, ond yn ysgafnach.
Flynyddoedd yn ôl fuodd 'na hen wr farw yn y pentre. Roedd e wedi symud o Loegr tua dechrau'r 30au i weini ar ffermydd ac wedi priodi merch leol. Roedd e wedi colli cysylltiad â'i deulu yn Lloegr ac roedd ei holl gysylltiadau erbyn hynny - a holl gynulleidfa'r angladd - yn Gymry Cymraeg.
Dwi'n cofio mynd ar y bws ar ôl yr angladd a chlywed dwy fenyw'n siarad, un yn dweud wrth y llall "Set ti'n meddwl fydde'r gwinidog wedi gweud rhwbeth yn Susneg - achos Sais odd Fred wedi'r cwbwl".

[Hen Rech Flin]

I'r galarwyr mae'r angladd yn bennaf, ond mae o'n ffordd iddynt dangos eu parch at dy gof a'u gwerthfawrogiad am dy fywyd. Prin y byddai gwasanaeth crefyddol i ffarwelio a thi yn dangos y fath parch.

Dim ond un angladd seciwlar yr wyf wedi ei mynychu sef un Dai Francis (tad Dr Hywel Francis AS Pontypridd). Roedd o'n cyfarfod parchus a theimladol a chwbl deilwng, mwy felly nag ambell i angladd crefyddol imi ei fynychu.

Byddai'r rhan fwyaf o drefnwyr angladdol yn gallu cysylltu â threfnydd gwasanaeth coffa seciwlar a ran dy deulu, mae 'na dipyn ohonynt ar gael - er rwy'n ansicr o faint o rai Cymraeg sydd.

[Mali]

hynny ydi, y cwestiwn ydi os ydi'r rhan fwya o'r galarwyr am weld isio angladd grefyddol, pwy ydw i i wrthwynebu? Os ydi o'n gysur iddyn nhw, hwre? Ddim fel petai bydd gen i fawr o ots am y peth. Fydda i 'di marw!

'It's your funeral', felly fe ddylen nhw barchu dy ddymuniadau di amwni!
Dim ond mewn un 'angladd' dwi di bod iddo yma , ond Celebration of Life oedd o mewn funeral home. 'Roedd tua 150 o bobl yno , ac 'roedd croeso i unrhyw un fynd i'r tu blaen i ddweud gair, neu rannu atgof ayb. Hefyd , 'roedd cerddoriaeth a darlleniadau priodol , lluniau, a chyfle i sgwrsio dros baned wedyn.
Braidd yn ddiethr i mi gan nad oedd na'r un weddi gyhoeddus yno , ond doedd na ddim yn fy rhwystro i ddweud gweddi fach dawel.

[Dylan]

dw i'n gobeithio bydd pob darn o fy nghorff yn cael ei rhoi i rhyw bwrpas defnyddiol wedi i mi farw. Fydda' i'n berffaith fodlon pe na fyddai unrhyw ddarn ohono i ar ôl i'w gladdu erbyn diwedd!

[Macsen]

Braidd yn gynnar i ddechrau pendroni am dy angladd Dylan. Ta oes 'na rywbeth dwyt ti heb ddweud wrthan ni?

[Mr Gasyth]

Mae'r cwestiwn o angladd a phriodasau yn un sydd yn pwyso arna i hefyd o dro i dro. A minnau wedi fy magu mewn teulu anghydffrufiol, tydw i hd yn hyn heb fynychu angladd na phriodas 'seciwlar', ac o'r herwydd y defodau priodi a chladdu anghydffurfiol Cymraeg ydi'r unig rai sy'n gyfarwydd i mi.

Yn ffodus, er fy anghrediniaeth, rwy'n mwynhau defodau capelaidd - y cyd-ganu emynau, y traddodi o'r pulpud a'r gweddio hyd yn oed. Be fyddai'n neud mewn priodas ydi cymeryd fod pob crybwylliad o Duw yn golygu 'pawb sydd yma' - mae'r priodi yn digwydd o flaen pawb, gyda bendith pawb ac ati ac ati. Mewn angladd mae o ychydig anoddach achos mae'r lol bywyd tragwyddol yn dod mewn iddo fo fel mod o gysuro'r galarwyr, sy'n rhoi dim cysur i mi o gwbl wrth gwrs. Ond eto dio'n genud dim drwg i mi chwaith.

O ran angladd, tydi o'n gneud fawr o wahaniaeth i mi achos fyddai ddim yno. Ond gyda phriodas mae'n wahanol - mi fyddai yno, a chan fod y ddefod mor bwysig (yn wir yn bwysicach) a'r ffurfioldebau cyfreithiol ar achlysuron fel hyn, mae'n anodd gen i ddychmygu teimlo fy mod wedi mynd drwy'r ddefod o briodi heb i honno fod yn un draddodiadol mewn capel anghydffurfiol. Oherwydd dyma'r tradodiad dwi wedi fy ngeni ynddo, a dyma'r defodau sydd wedi eu pasio lawr i mi, y mae eu ystyr yn dibynnu ar eu hynafoldeb.

A fuaswn felly yn ragrithiwr o'r radd flaenaf i briodi mewn capel? Ynteu a yw'n ofynol i mi fynd drwy ddefod arall mewn lle diarth sy'n gwbl anghyfarwydd i mi a sydd heb unrhyw ystyr i mi?

[Boibrychan]

Dim ond jest dechrau cydnabod anffyddiaeth ydw i a dwi ddim yn medru cweit dygymod a beth mae o'n feddwl i'n nheulu ac ati. Dwi'm yn licio meddwl gormod am y peth ond dwi'n cytuno a ti Mr Gasyth gan fy mod dim ond yn gwybod y fersiwn grefyddol o seremoniau angladd a phriodas.

Dwi di bod yn meddwl ceisio ffeindio llyfr sy'n trafod y matter "practicalaties of athiesm" neu rhywbeth tebyg.
Ydy'r fath lyfr yn bodoli

Os ydy y bywyd tragwyddol wedi rhoi cysur i gymaint o fy nheulu a hynny yn ddiweddar hefyd fel mae hi'n digwydd, bydde hi'n iawn yn achos fy angladd i, i beidio rhoi'r cyfle iddyn nhw gael cysur?



Petawn i'n marw fory angladd crefyddol yn ei naws bydden i'n gael gan fy mod heb rybuddio neb am fy nymuniadau. A fydde fe ddim y peth gwaethaf yn y byd (yr angladd crefyddol dim y marw! )

Gyda lwc fydd hyn ddim am sbelen go lew a falle erbyn pryd yna, prin fydde fy nheulu a ffrindiau fydde eisiau angladd crefyddol.

[Macsen]

Mi fyddwn i'n mynd am briodas neu angladd 'grefyddol' bob tro, am y rheswm bod y fersiynau 'anghrefyddol' mor ddiflas - dim mwy na'r un seremoniau gyda'r holl liw wedi ei olchi allan. Mae'n werth cofio mai nid yn unig angladdau a priodasau cristnogol yw'r rhain ond rhai Cymreig hefyd, a dylen ni ddim taflu babi ein diwylliant ni allan gyda dwr bath crefydd.

Y peth pwysig ar amseroedd ingol fel angladd neu briodas dwi'n meddwl ydi fod yna ryw fath o strwythur cyfarwydd a cysurus i'r diwrnod mae modd dibynnu arno.

[Mr Gasyth]

Y peth pwysig ar amseroedd ingol fel angladd neu briodas dwi'n meddwl ydi fod yna ryw fath o strwythur cyfarwydd a cysurus i'r diwrnod mae modd dibynnu arno.

Dyma on i'n drio gyfleu, ond mewn ffordd llawer mwy cwmpasog! Cytuno am dy bwynt am daflu'r diwylliant allan efo'r dwr bath hefyd.