Agweddau pobl eraill

[Seonaidh/Sioni]

Gaeleg...o'r naill law, na, dydy'r Aeleg ddim yn cael hanner cymaint o bobl sy'n darlledu negesau yn ei herbyn. Ond o'r llall mae rhannau llydain iawn o'r Alban lle na weli di ddim byd yn ymwneud a'r Aeleg, heb son am ei chlywed hi! Efallai, felly, dydy'r Aeleg ddim mor "in yer face" a'r Gymraeg. Rdw i'n gyfarwydd a phobl yma fyddai "wrth Aeleg" petai pethau'n mynd iddi fel yr aeth i'r Gymraeg.

[Kantorowicz]

Diolch, Madrwyddygryf a'r Mabafradlon am yr awgrymiadau. Ar y cyfan, casineb hollol afresymol sydd yno, mae'n ymddangos, er bod i'r ddadl trethi ryw fymryn o reswm efallai (hyn yn oes os yw hynny'n rheswm "Thatcheraidd" amhleserus). Diddorol gweld y grwp Facebook yna - mae'n drueni fod rhai ethaf ifanc yn fodlon ymuno yn yr atgasedd twp (yn lle bod y cyfan yn perthyn i do hen fydd yn diflannu mewn ychydig flynyddoedd, fel a welir, rwy'n credu, ar y BBC).

Rhyfeddach serch hynny imi, gan ystyried (er un enghraifft yn unig) yr holl ffys a dderbyniodd y tywysog Harri yn ddiweddar am iddo ddefnyddio'r gair "paki", yw bod y trafodaethau hyn yn gallu mynd yn eu blaenau heb unrhyw sylw 'swyddogol'. Efallai na fydd barn y bobl hyn o bwys o gwbl yn y pen draw, ond eto mae'n anodd gen i gredu tasai carfan o bobl - ta pa mor fechan eu niferoedd - yn poeri atgasedd fel hyn am yr anabl, yr Iddewon neu'r duon (etc.), prin iawn na welid ymgyrch yn y cyfryngau yn sôn am hiliaeth annerbyniol yn torri i'r wyneb.

Mae'n fy atgoffa o'r swasticas ac arwyddion gwrth-iddewig eraill a welir yn graffiti yng ngwledydd dwyrain Ewrop. Nid yw hyn o reidrwydd yn arwydd bod mudiadau ffasgaidd o bwys yn bodoli yno - does dim Iddewon ar ôl yn y rhan fwyaf o'r llefydd hyn ta beth - ond yn hytrach yn dangos bod pobl yn cydio yn symbolau (unrhyw symbolau) er mwyn mynegi rhyw angst di-ffocws.

Mae'r gymhariaeth â'r Alban yn ddiddorol, Sionaidh - addysg o ryw fath sydd ei angen, dywedwn i, i ddangos nad yw'r natur "in yer face" yma yn fygythiad. Ond er mwyn hyn, bydd angen i'r cyfryngau Saesneg eu hiaith (a'r gymuned Saesneg ei haith yn gyffredin) ddechrau cymryd tipyn yn rhagor o ddiddordeb ym materion (a bodolaeth) yr iaith.

[Gwenci Ddrwg]

Tipyn hwyr...ond does dim byd newydd i'w weld ar y wefan ti'n arddangos. Pobl sy'n ymosod y Gymraeg/Gaeleg/Llydaweg/unrhyw iaith rhanbarthol, bydden nhw'n ymrithio ym mhob man er gwaethaf unrhyw fath ddichonadwy o pest control (tipyn fel corynod).

[Kantorowicz]

Dim byd newydd... ie, dyna oedd y broblem i ddechrau - y ffaith 'mod i'n credu fod agweddau fel hyn wedi hen ddarfod o'r tir. Neu o leiaf na fyddent mor uchel eu croch ar lefydd fel y BBC. Mae'n bryd imi ddychwelyd i Gymru - mae'r lle yn mynd yn rhyfeddach bob dydd!

[Hogyn o Rachub]

Os tisho gweld agweddau gwrth-Gymraeg ar waith gweler blog Betsan Powys ar safle BBC Wales Politics. Mae pob trafodaeth, bron yn ddieithirad, yn troi yn rantiau gwrth-Gymraeg/gwrth-ddatganoli.

Lle mae'r bobl hyn, tybed? Dwi wedi cyfarfod â rhai pobl wrth-Gymraeg ond mae rhai o'r pethau sy'n cael eu dweud mewn rhai llefydd nid yn unig yn gallu bod yn ddigalon ac yn sarhaus, ond mae'n gwneud i rywun feddwl faint o amlwg ydi agweddau gwrth-Gymraeg yng Nghymru o ddifri.

[Shon]

Yr 'usual suspects' ydy nhw beth bynnag, yr un criw bach cegog yn gweiddi'r run hen bregeth ar nifer o flogiau a negesfyrddau. Mae eu syniadau o sut mae'r iaith yn cael ei ddefnyddio gan bobl Gymraeg iaith-gyntaf yn hollol anghywir, mae'r rhan fwyaf yn credu mai rhyw ddiddordeb rhan-amser yw'r iaith ganddom, ble yr ydym yn dewis ei siarad er mwyn bod yn 'wahanol' ac i greu trafferth.

Does dim siarad a hwy, mae nhw'n anwybyddu pob ymdrech i egluro'r gwir iddynt, tydy nhw ddim yn deall...ac yn bwysicach byth tydy nhw ddim EISIAU deall, mae nhw'n hapus braf yn eu byd bach eu hunain yn meddwl eu bod yn iawn. Mae'r rhan helaeth yn bobl oedrannus styfnig, a fel ddywedodd rhywun uchod maen't yn dueddol i fod yr un mor unochrog ac undonog gyda pynciau eraill ee. y trafferthion yn Gaza.

Diolch byth does dim llawer ohonynt o gwmpas, a dwi'n ddigon balch fod yno safleoedd fel y BBC i gadw'r diawled i gyd yn yr un lle! Chwerthin arnynt dwi'n dueddol o wneud dyddiau yma, tydy nhw ddim hanner mor beniog a chosmopolitan ag y mae nhw'n ei gredu, ddim yn haeddu eiliad pellach o'n sylw.

[huwwaters]

Yr 'usual suspects' ydy nhw beth bynnag, yr un criw bach cegog yn gweiddi'r run hen bregeth ar nifer o flogiau a negesfyrddau.

Cywir. Fel arfer mae'r bobol yma'n fach yn gorfforol ac yn cael eu hanwybyddu gan nad oes ganddynt cyflawniadau. Yr unig ffordd cawn nhw sylw yw gyda'u cegau.

[Hogyn o Rachub]

I fod yn onest dwi ddim yn meddwl eu bod nhw mor brin ag ydych chi'n awgrymu, ond gobeithio eich bod chi'n iawn.

[Chickenfoot]

Mae dal llawer o bobl yn y wlad yma sy'n meddwl mai iaith ffug gafodd ei dyfeisio mewn tafarn yw'r Gymraeg i wylltio Saeson sy'n dod yma ar eu gwyliau (gweler New Tricks ar BBC 1 c. '07). O wel, bydd y pobl yma ddim yn byw am byth, felly efalla fydd siawns i newid agweddau pobl yn y dyfodol.

[Seonaidh/Sioni]

Mae dal llawer o bobl yn y wlad yma sy'n meddwl mai iaith ffug gafodd ei dyfeisio mewn tafarn yw'r Gymraeg i wylltio Saeson sy'n dod yma ar eu gwyliau (gweler New Tricks ar BBC 1 c. '07). O wel, bydd y pobl yma ddim yn byw am byth, felly efalla fydd siawns i newid agweddau pobl yn y dyfodol.

Cywir, bydden nhw ddim yn byw am byth. Ond ystyria hyn: roedd y Saesneg, a'r Gymraeg, yn bodoli ryw 2 ganrif yn ol, mewn ffurfiau eitha tebyg i heddiw. Ond does na ddim un person oddi yna yn fyw heddiw. Mae'r ieithoedd wedi cael eu parhau gan blant siaradwyr.

Ac mae'r un peth, yn anffodus, yn wir am agweddau. Na - dydym ni ddim i gyd yn mynegi'r un agweddau tuag at fywyd a fynegai ein rhieni - neu hyd un oed yr un iaith yn union. Ond ni thranc agweddau o reidrwydd pan fydd farw y rhai a'r agweddau. Felly, rhaid wrth geisio newud agweddau hyll.