Golwg360/Golwg yn cyhoeddi Sylwadau Enllibus?

[sian]

OK - mae hyn yn hollol warthus - pennawd yn y Cylchgrawn papur ac ar Golwg360 yn dweud "Cymharu cefnogwyr Llais Gwynedd 'â’r BNP'" mewn stori am ddadl rhwng Gwilym Euros Roberts a Cai Larsen.

Paragraff cyntaf: "Mae aelod o Llais Gwynedd wedi cwyno’n swyddogol wrth Blaid Cymru ar ôl i un o’i haelodau gyhuddo cefnogwyr Llais Gwynedd o gefnogi’r BNP."

Doedd Cai Larsen DDIM yn cymharu cefnogwyr Llais Gwynedd â'r BNP. Gwilym Euros oedd wedi camddeall. Ac fe gamodd Alwyn ap Huw oedd yn rhan o'r ddadl wreiddiol i mewn i gadarnhau hynny.

[Hedd Gwynfor]

OK - mae hyn yn hollol warthus - pennawd yn y Cylchgrawn papur ac ar Golwg360 yn dweud "Cymharu cefnogwyr Llais Gwynedd 'â’r BNP'" mewn stori am ddadl rhwng Gwilym Euros Roberts a Cai Larsen. Doedd Cai Larsen DDIM yn cymharu cefnogwyr Llais Gwynedd â'r BNP. Gwilym Euros oedd wedi camddeall. Gwael!

Cytuno, dwi wedi darllen beth ddywedodd Cai Larsen, a dyw e ddim yn cyhuddo cefnogwyr Llais Gwynedd o gefnogi’r BNP. Newyddiaduriaeth pathetig unwaith eto.

[dawncyfarwydd]

Wedi gyrru'r ebost hwn i Golwg. Dwi'n disgwyl cael ateb yn dweud mai stori beta oedd hi a bod y ffaith ei bod yn gelwydd noeth yn arwydd o broblemau cychwynnol, a bod y bai ddyn busnes doji sydd wedi gadael y wlad...

Annwyl gyfaill

Mae'r erthygl sydd gennych yn y cylchgrawn heddiw am sylwadau honedig Cai Larsen yn gamarweiniol a chelwyddog.

Camddeallodd Gwilym Euros frawddeg ar flog Cai Larsen, gan gymryd brawddeg oedd yn dweud NAD oedd CL yn credu bod aelodau Llais Gwynedd yn cefnogi UKIP i olygu'r gwrthwyneb llwyr! Mae ystyr y frawddeg yn gwbl amlwg yn y cyd-destun.

Mae'n fy nhristau'n arw eich bod yn cymryd rhywun fel Gwilym Euros ar ei air heb wneud yn siŵr fod ei honiadau'n gywir. Pe baech wedi darllen y sylwadau'n gywir ac yn eu cyd-destun byddai'n amlwg ichi fod Gwilym Euros yn bod yn Gwilym Euros ac yn chwythu gasget ar sail ei gamddehongiad ei hun.

Dylech ymddiheuro'n llaes i Cai Larsen. Ond nid dyma'r pryder mwyaf sydd gen i. Rydych yn fodlon cael eich defnyddio gan Gwilym Euros i hybu ei gelwydd dwl ei hun a hynny heb wirio ffeithiau. Mae'n anodd i mi ddweud pa mor flin mae hyn yn fy ngwneud.

Yn bersonol rwy'n credu y dylai Cai Larsen fynd â Golwg a Gwilym Euros i gyfraith - mae'n debyg fod ganddo groen tewach na hynny ond y peth iawn fyddai ichi gyhoeddi ymddiheuriad ac esboniad llawn yr wythnos nesaf. Ac er mor hawdd y daw penawdau ganddo, dylech anwybyddu'r ffŵl ag yw Gwilym Euros os nad ydych yn barod i wirio ei honiadau.

[GT]

Dim ond gair bach i ddiolch am y sylwadau uchod ac i gadarnhau fy mod yn bwriadu edrych ar y posibilrwydd o gymryd camau cyfreithiol yn erbyn Golwg Cyf.

[Hen Rech Flin]

Yr wyf innau wedi danfon llythyr i Golwg hefyd.

Dechreuodd y drafodaeth yma trwy imi nodi pryder bod rhai o'm perthnasau sydd yn genedlaetholwyr wedi pleidleisio i UKIP eleni, gan nad oedd aelod o Lais Gwynedd yn sefyll. Mi awgrymais y byddai'r Blaid o bosib wedi ennill eu pleidlais yn ôl pe bai'r Blaid wedi nodi pa mor batholegol o wrth Gymraeg yw UKIP.

Ymateb Cai oedd fy mod i'n anghywir, bod dim prawf o'r nifer a bleidleisiodd bod cefnogwyr Llais Gwynedd wedi troi yn ei filoedd i UKIP na'r BNP.

Hynny yw os oedd unrhyw un wedi gwneud cam a Llais trwy ei gysylltu â phlaid asgell dde, myfi sydd ar fai. Achub cam Llais trwy ddweud bod fy ofnau yn ddi-sail oedd Cai.

Rwy'n deall sut bod modd camddehongli sylwadau Cai trwy eu cymryd allan o gyd-destun ond wedi bod yn rhan o'r drafodaeth rwy'n hollol sicr nad oedd Cai yn cysylltu Llais a'r BNP i'r gwrthwyneb dweud NAD oedd sail gwneud y fath gysylltiad ydoedd.

[osian]

Ma cyhoeddi pennawd "Aelod o Blaid Cymru yn cymharu Llais Gwynedd i BNP" (neu rywbath i'r perwyl yna), heb stori sydd yn cefnogi'r honiad yna yn llwyr yn gywilyddus. Sa'm angan mynd yn agos at blogmenai i weld mai bwlshit llwyr ydi hi.

[dawncyfarwydd]

Mae'r stori'n dal ar Golwg360. Pa mor analluog fedar rhywun fod?!

[Hogyn o Rachub]

Ac mai dal yno 'fyd!

Sôn am gymysgedd o newyddiaduraeth bathetig gan Golwg a gwleidyddiaeth gwter gan Lais Gwynedd (meind iw, sypreis sypreis de). Be all rhywun ddweud?

[dafydd]

Mae Golwg wedi anghofio un o driciau sylfaenol newyddiaduraeth tabloid - jyst rhoi marc cwestiwn ar ôl unrhyw bennawd dadleuol! "Cymharu cefnogwyr Llais Gwynedd 'â’r BNP'?" a gadael y darllenwr i weithio allan yr ateb - sef 'Na' yn yr achos yma.

[dawncyfarwydd]

Mae'r stori wedi newid yno erbyn hyn - 'Plaid yn taro'n ôl yn erbyn cyhuddiadau Llais Gwynedd'. Digon i ddod â'r erthygl o dir enllib mae'n debyg, ond dim digon i wneud yn siŵr fod pawb yn gwybod mai cyhuddiad celwyddog ydi hwn. Does dim ymddiheuriad chwaith, nac esboniad fod yr erthygl wedi'i newid ar ôl camarwain pobl yn wreiddiol.

Wedi cael yr 'ymateb' hwn gan Golwg...

Annwyl Dawn Cyfarwydd,



Diolch yn fawr am eich llythyr yn ymateb i erthygl yn rhifyn diweddaraf Golwg.



A ydych yn awyddus i’r llythyr gael ei gyhoeddi yn y cylchgrawn yr wythnos nesaf?



Yn gywir,



Siân Sutton