Lefel carma a graddio negeseuon

[garynysmon]

Dwi ddim yn trio rhoi noc i'r system yma o gwbl (dydi o heb hyd yn oed cael ei thraed oddi tanodd eto!). Ond dwi dal ddim cweit yn berffaith siwr o'r system, oherwydd mae sawl ardal llwyd (grey areas) onid ddim?. Engraifft o hynny yw 90% o'r dyfyniadau ar dop y sgrin. Negeseuon doniol a chofiadwy, ond sydd fwy na thebyg yn hollol 'off-topic' a di-werth i brif ffrwd y sgwrs. Be ydi'r sefyllfa efo pethau felly?

[Aran]

Engraifft o hynny yw 90% o'r dyfyniadau ar dop y sgrin. Negeseuon doniol a chofiadwy, ond sydd fwy na thebyg yn hollol 'off-topic' a di-werth i brif ffrwd y sgwrs. Be ydi'r sefyllfa efo pethau felly?

Dw i'n meddwl bod hynny'n gwestiwn da. Mae angen defnyddio'r sustem carma mewn ffordd call, a dyna ydy rhan o'r rheswm bod yr hawl i'w defnyddio wedi cael ei rhannu'n araf, ac yn seiliedig ar gyfraniad pobl i'r cymuned...

Mae isio fod yn gytbwys. Dw i heb eto, er enghraifft, roi'r un pwynt carma negyddol i'r un cyfraniad yn y Blwch Tywod, a dw i ddim yn rhagweld gwneud - dim ond ymosodiad personol 'sai'n galw am gymedroli yn fan'na, a byddai angen mwy na phwynt carma negyddol felly...

Ar ran cyfraniadau di-bwys/doniol - pe bai rhywun yn postio llawer o bethe felly a dw i'n gweld nhw i gyd yn ddi-bwys a dim yn ddoniol, 'swn i'n debyg o raddio un ohonyn nhw yn y pen-draw - ond fuaswn i ddim yn graddio pob un.

Mae'n bwysig hefyd osgoi penderfynu bod hwn a hwn yn boen ac wedyn mynd i chwilio am bob neges ganddo bod modd graddio'n negyddol - bydd patrymau felly'n dangos yn glir i'r gweinyddwyr, ac mae modd i ni wedyn dadwneud patrwm annerbyniol o raddio (neu slofi fo i lawr i lefel rhesymol).

Fel unrhyw sustem newydd, wneith o gymryd amser i ddod i arfer efo fo. Ond y peth pwysig ydy safon y Maes. Pe bai'r sustem yma'n troi allan i gael effaith negyddol, fyddai hi ddim yn parhau am yn hir. Yn bersonol, dw i'n amau mai gwella'r lle bydd hi...

[eusebio]

Ar ran cyfraniadau di-bwys/doniol - pe bai rhywun yn postio llawer o bethe felly a dw i'n gweld nhw i gyd yn ddi-bwys a dim yn ddoniol, 'swn i'n debyg o raddio un ohonyn nhw yn y pen-draw - ond fuaswn i ddim yn graddio pob un.

Dwi wedi rhoi tic bach difyr i sawl neges 'off-topic' doniol a difyr sydd wedi gwneud i mi boeri llond ceg o goffi ar hyd fy sgrîn.

Mae sawl enghraifft yn yr edefyn chwaraeon o sgwrs yn mynd ar gyfeilion doniol a difyr heb fynd yn hollol hurt - nid oes raid i BOB sgwrs(yn fy marn i) aros ar y pwnc gwreiddiol os yw'n datblygu'n un difyr.

[nicdafis]

Yn gyntaf, rhaid i mi ddweud sori am fod mor lawdrwm neithiwr. Mae Geraint ac Aran wedi wneud yr un pwnytiau heb swnio mor ddi-amynedd a chas. Mae 'na ddigon o le i mi ddysgu sut i fihafio mewn cymdeithas, mae'n debyg

Mae pwynt am bethau doniol a ffwrdd-â-hi yn un dilys iawn, ond yw hi? Fel mae Aran wedi sôn, cwestiwn o gydbwysedd yw e. Hyd yn oed yn y seiadau mwya "difrifol", mae wastad lle i sylwadau ysgafn sy'n codi'r hwyliau heb ddifetha ar y sgwrs. Y tric yw i nabod y gwahaniaeth, ond dyw hi? Dyma beth oedd 'da fi neithiwr, ond mynegais i fy hunan yn lletchwith iawn.

Ac i'r bobl sydd heb ddiddordeb yn y broses o gadw'r safonau ar y maes yn weddol uchel (fel y maen nhw, wrth gymharu â phob negesfwrdd Cymraeg arall dw i wedi ei weld) alla i ddweud eto bod croeso i chi i'ch barn, a dw i'n fawr gobeithio y byddwch chi'n gallu ffeindio rhywbeth o werth yma heb boeni am y gwaith "tu ôl i'r llenni" sy'n anghenrheidiol i gadw'r lle i fynd. Nid eich problem chi yw hon. Ond os nag oes unrhywbeth adeiladol 'da chi i'w ychwanegu i'r sgwrs, sticiwch at y seiadau lle <b>mae</b> diddordeb 'da chi. Dych chi yn sylweddoli pa mor bryfoclyd byddai fe 'sech chi'n mynd i'r seiat Chwaraeon a phostio rhywbeth fel:

Dw i ddim yn lico chwaraeon. Mae unrhywun sy'n wastraffu ei amser hamdden gwylio pêl-droed yn dwpsin.

Fyddech chi ddim wedi torri unrhyw rheol penodol ar y maes (wel, byddech, achos bod hynny yn trol amlwg, ond dyw e ddim yn "ymosodiad personol") ond dych chi'n gweld pa mor anhebyg yw e y byddai neges fel 'na yn arwain at unrhyw trafodaeth gall?

Yn bersonol, dw i ddim yn ffan mawr chwaraeon fy hun (er mod i'n gwylio ambell gêm). Does dim "hobis" 'da fi, chwaith. Dw i ddim yn un sy'n lico mynd i'r dafarn bob nos. Mae'n lot well 'da fi treulio fy amser sbâr trial datblygu cymunedau uniaith Cymraeg ar y we. Dw i'n gwybod yn iawn pa mor drist yw hynny, ac weithiau dw i'n teimlo fel un o'r dynion trist 'na sy'n adeiladu rheilffyrdd model yn eu llofftiau.

Mae croeso i ti chwarae gyda fy nhrenau bach, ond plis, da ti, paid a chachu ar y traciau

[Barbarella]

Os ydi neges yn cyfrannu rhywbeth diddorol neu gwerthfawr i'r drafodaeth, yna mae'n neges dda

Dwi'n meddwl bod hiwmor yn sicr yn gallu cyfrannu at drafodaeth, ac yn sicr yn rhywbeth gwerthfawr. Y cyd-destun sy'n bwysig -- defnyddiwch eich synnwyr cyffredin! Os oes jôc sâl ofnadwy mewn edefyn o'r enw "y jôcs gwaetha erioed", am wn i gallai haeddu clec ar y botwm difyr. Ond os yw ynghanol drafodaeth difrifol, ac yn hollol amherthnasol, falle byddai'n ddiwerth. Wrth gwrs, mae gan bawb barn gwahanol ar y pethau hyn, a dyna mantais yr holl syniad yma -- mae'n fwy democrataidd na grwp bach o gymedrolwyr, fydd o anghenrhaid gyda llai o amrywiaethau barn.

Dychmygwch eich bod chi'n cael paned neu beint gyda chriw o ffrindiau, ac yn trafod rhywbeth sy'n gyffredin i chi gyd -- chwaraeon, ffilmiau, gwleidyddiaeth... beth bynnag. Mae un ohonoch chi'n cracio jôc, ac mae pawb yn chwerthin. Grêt!

Nawr dychmygwch yr un sefyllfa, ond bod rhywun feddw iawn yn dod draw atoch chi ac arllwys peint dros un o'ch ffrindiau "am laff", ac yn tarfu ar y sgwrs. Dyna beth sy'n digwydd weithiau ar y Maes. Falle bod y ddau enghraifft yn ddoniol i'r sawl sy'n eu gwneud nhw, ond nawr dyma gyfle i bawb arall ddweud bod un yn dderbyniol, a'r llall ddim.

[Aran]

Ar ran cyfraniadau di-bwys/doniol - pe bai rhywun yn postio llawer o bethe felly a dw i'n gweld nhw i gyd yn ddi-bwys a dim yn ddoniol, 'swn i'n debyg o raddio un ohonyn nhw yn y pen-draw - ond fuaswn i ddim yn graddio pob un.

Dwi wedi rhoi tic bach difyr i sawl neges 'off-topic' doniol a difyr sydd wedi gwneud i mi boeri llond ceg o goffi ar hyd fy sgrîn.

Mae sawl enghraifft yn yr edefyn chwaraeon o sgwrs yn mynd ar gyfeilion doniol a difyr heb fynd yn hollol hurt - nid oes raid i BOB sgwrs(yn fy marn i) aros ar y pwnc gwreiddiol os yw'n datblygu'n un difyr.

Ia, pwynt da - dylwn i fod wedi ychwanegu bod negeseuon sydd YN ddoniol yn haeddu 'difyr', ond wrth gwrs mae pawb yn gweld pethe gwahanol yn ddoniol... mae disgrifiad Barbarella'n berffaith yn hynny o beth, am wn i.

A ga i rybuddio pawb i fod yn ofalus am ymdrech Nic i hawliau nad ydy o ddim yn foi tafarndai? Mae'n andros o anodd i'w gael o i stopio pryniau peintiau pan mae rhywun yn trio cael hanner bach sydyn ac wedyn mynd yn ôl i'w waith...

[Mwnci Banana Brown]

Oes na bobol heblaw y cymedrolwyr yn cael graddio eto? Os ma'r sustem wedi dechrau ers wthnosau, mae'n broses araf iawn. Os modd gweld ein gradd carma hyd yn oed os nad ydyn yn cael graddio eto?

[eusebio]

Oes na bobol heblaw y cymedrolwyr yn cael graddio eto? Os ma'r sustem wedi dechrau ers wthnosau, mae'n broses araf iawn. Os modd gweld ein gradd carma hyd yn oed os nad ydyn yn cael graddio eto?

Mae'r sawl sydd â charma positif yn gallu graddio, ond mae'r rhai sydd heb gael y nifer hanfodol o bleidleisiau (neu â charma negatigf) yn gorfod disgwyl.

[Mwnci Banana Brown]

A os modd gweld lefel carma dy hun?

[Barbarella]

<strike>Mae'r pleidleisio wedi ei atal am y tro. Cyfnod prawf yw hyn, ac mae ambell i chwilen fach wedi codi ei phen, felly ni am ladd rheina cyn cario mlaen. Bydd y botymau nôl yn y man!</strike>

Pob dim i weld yn iawn nawr, mae'r botymau nôl...