Ble Wyt Ti Rhwng? gan Hefin Wyn

[sian]

Adolygiad difyr gan Ifor ap Glyn yn Barn mis yma.

[Gorwel Roberts]

Be sydd gan Ifor i'w ddweud?

[sian]

Pryna Barn!

[Gorwel Roberts]

Be wyt ti? Swyddog marchnata Barn neu rywbeth! (Sori - joc - mi bryna' i Barn)

[Iesu Nicky Grist]

mi bryna' i Barn

Paid! Nes i brynu fe er mwyn darllen yr erthygl hefyd...os anfoni di dy gyfeiriad ata'i, gei de fe trwy'r post. Ond wir, cadwa dy £2 ar gyfer papur toilet o ansawdd gwell.

[Gorwel Roberts]

Tydi Barn yn da i ddim fel papur toiled, fel y papur Izal mae fy modryb yn ei brynu. Ond pam wyt ti mor wyllt o feirniadol ohono?

[løvgreen]

Tydi Barn yn da i ddim fel papur toiled, fel y papur Izal mae fy modryb yn ei brynu. Ond pam wyt ti mor wyllt o feirniadol ohono?

Ie, a fedri di enwi cylchgrawn Cymraeg gwell? (a paid a deud Golwg )

[Lals]

Mae Ifor ap Glyn yn eithaf beirniadol. Un pwynt rwy'n tueddu i gytuno gydag e yw bod Hefin Wyn yn ceisio cynnwys gormod. Canu poblogaidd Cymraeg yw'r testun felly mae'n rhaid iddo gynnwys canu g werin a gwlad yn ogystal a roc. Tase fe wedi sticio at roc efallai base wedi gallu rhoi mwy o chwarae teg i rai artistiaid.

[Gorwel Roberts]

Hawdd deud sticio at roc ond mae yna gymaint o groesffrwythloni rhwng gwahanol arddulliau mae hynny'n amhosib. Un peth oedd yn fy ngwylltio i ers talwm oedd nad oedd gwerin neu roc gwerin yn cael ei ystyried yn ffurf ar gerddoriaeth fodern e.e. byddai pobl yn son am roc, dawns, gwlad, reggae, ffync ayb yn yr un gwynt ond heb roi lle i werin yn y potas.

Sut allai'r awdur sticio at roc gan mai datblygiad gwahanol arddulliau a gwahanol chwaeth a gwahanol garfannau a chynulleidfaoedd oedd hanes canu poblogaidd yn y cyfnod i ryw raddau (o gymharu â chyfnod pan fyddai holl ddilynwyr yr SRG yn mynd i weld Edward H Dafis yn un haid) gan adlewyrchu tuerddiadau'r farchnad ryngwladol.

[nicdafis]

Neges gan Hefin Wyn, awdur y llyfr:

Am fod Ifor ap Glyn yn tynnu sylw yn ei adolygiad ar dudalennau Barn at wallau ffeithiol ni fedraf ond ymddiheuro mewn sachliain a lludw am y llithriadau. Gresyn fy mod wedi disgrifio Geraint Lovgreen fel dysgwr. Deallaf ballach bod ganddo un rhiant a fedrai'r Gymraeg a bod yr iaith wedi ei throsglwyddo iddo ar yr aelwyd. Gresyn i mi ddatgan ei fod yn aelod o'r grwp Doctor pan oedd yn y coleg. Ar ôl gadael coleg yr ymunodd â'r grwp, wrth gwrs. Mawr hyderaf, fodd bynnag, fy mod, gyda chymorth hogiau Cytgord (tud 56) wedi llwyddo i gydnabod ei ddawn ddeifiol ddychanol fel perfformiwr a chyfansoddwr - ac wedi sillafu ei gyfenw'n gywir yn y llyfr. Ymddiheuriadau i eraill sydd wedi eu camenwi mewn rhyw ffordd neu'i gilydd. Gobeithio nad yw'r llithriadau wedi amharu'n ormodol ar ymdrech y naratif i dafoli eu cyfraniad i'r maes adloniant. Ond wedyn rhaid amau cywirdeb Ifor pan ddywed mai `plentynnaidd` yw cymharu rhefru gitarau'r Anhrefn â swn tri thractor yn pabwyro. Onid yw'r Llundeiniwr wedi clywed tri Ffergi tanwydd TVO yn ei hagor hi mas? Rhaid canmol bechgyn Anhrefn an greu swn cyffelyb. Dyna un o hanfodion y swn pync tanddaearol; y gwrthwyneb i swynoldeb. Crasder a fedrai ferwino'r clustiau. Roedd cyfraniad y grwp yn fwy na hynny, wrth gwrs. Sonia am hynny yn yr un gwynt â'm hymgais i achub cam Bryn Fôn am y beirniadu annheg a fu arno yntau. Yn wir, ni chredaf i ddim mwy `plentynnaidd` ddigwydd yn y byd roc Cymraeg na'r beirniadu maleisus ac anaeddfed a fu ar gyfraniad Sobin/Bryn, yn arbennig ar dudalennau Sothach. Bydd caneuon diamser Bryn Fôn, llawer ohonyn nhw'n gyfansoddiadau'r digymar Emyr Huws Jones, fyw am getyn go lew o gymharu â chaneuon Yr Anhrefn a berthynent i gyfnod penodol. Eto dywed fy mod yn `wawdlyd` yn fy hymdriniaeth o benderfyniad Mike Peters i ganu'n Gymraeg. Ni all gynnig tystiolaeth i gefnogi'r gosodiad am nad oes dim ar gael. "Troi at gefnogi'r Gymraeg fel ei gyfraniad at achub amrywiaeth y byd wnaeth Mike Peters. Dyna oedd ei weledigaeth rhag gorseddu'r unffurfiaeth imperialaidd oedd yn rhan o unrhyw batrwm Americanaidd." Dyna fy ymgais i dafoli ei gyfraniad. Prin fod yna wawd yn y geiriau uchod. Teg fyddai dweud bod rhai o'r pwnditiaid a ddyfynnir yn amau gradd ei lwyddiant wrth berfformio'n Gymraeg. Ond nis gwawdir. Ceir enghreifftiau eraill o gamarwain y darllenydd.