ARTIST: mr.huw
ALBWM: HUD A LLEFRITH
LABEL: COPA CD 006
DYDDIAD RYDDHAU: DYDD LLUN 30ain MAWRTH
Albwm newydd sy’n crwydro i lefydd tywyll mr huw
Ar ôl i’r ffans glywed blas o’r albwm newydd gyda’r trac Canibals a Rhyw mae Copa’n falch i gyflwyno Hud a Llefrith, albwm newydd dyfeisgar a thywyll yr anghydffurfiwr mr.huw (Huw Owen). Bydd lansiad swyddogol i’r albwm yng Nghlwb Ifor Bach Caerdydd ar Fawrth 28ain ac yn yr Anglesey, Caernarfon ar Ebrill 3ydd.
Wedi’i gynhyrchu a’i recordio ar beiriant 8 trac gan mr huw yn “nhywyllwch iard esgyrn Nant Peris” ac “ystafell waed a rhyw Caernarfon”, mae Hud a Llefrith yn cydweddu storïau tywyll dros felodïau bywiog a hapus. Mae’r albwm yn ddilyniant arbennig i Llond Lle o Hwrs a Lladron clodwiw a ryddhawyd yn 2007.
Unwaith eto mae mr huw yn trin materion pob dydd ac yn creu delweddau cryf am farwoldeb, sef prif thema’r albwm hwn. Er hyn, dywedodd Huw,
“Er bod marwoldeb yn chwarae rhan fawr ar yr albwm dwi'n cysidro Hud a Llefrith i fod yn albwm positif. Dwi wastad wedi bod yn un am ysgrifennu am bethau tywyll. Mae'r ymennydd a’r dychymyg yn crwydro i mewn i lefydd na ddylen nhw weithiau, neu i lefydd y dylen nhw!”
Mae mr.huw yn herio genre ac yn gwthio ffiniau gan gyfuno a threfnu seiniau’n effeithiol gyda chryn ddychymyg a mynegiant cerddorol crefftus. Mae’n cyflwyno curiadau electronig, noeth ac weithiau hypnotig. Ond geiriau, storïau a delweddau mr huw a ddaw a’i dalent i’r amlwg.
Dywedodd y cyflwynydd BBC Radio 1, Bethan Elfyn,
“Mae Mr Huw yn dipyn o gymeriad - hiwmor sych a cherddor profiadol tu hwnt heb sôn am ei farddoni a'r defnydd creadigol o’r geiriau hollol nuts. Mr Huw di'r peth agosaf sy’ gynnon ni yng Nghymru i’r ‘anti-folk scene’, caneuon syml ar yr olwg gyntaf, ond sy'n cuddio tywyllwch mawr tu ôl i’r hiwmor - ydi mae'n codi ofn arna i ‘chydig bach ac wedyn fydda i’n chwerthin yn nerfus - dyna'r berthynas sy’ gen i â Mr Huw!”
Bydd Hud a Llefrith ar werth o ddydd Llun 30ain o Fawrth. Mae hefyd yn bosib ei brynu’n uniongyrchol o Sain, http://www.sainwales.com, neu yn ddigidol drwy i-tunes. Caiff yr albwm ei ddosbarthu gan Sain yng Nghymru a thrwy Proper yng ngweddill Prydain.
Rhestr caneuon:
1. Hunanladdiad
2. Petha Bach
3. Ffrind Gora Marw
4. Ofn Bod Ofn
5. Y Dyn, Y Chwedl
6. Mi Nath i Chdi Betha Drwg
7. Canibals a Rhyw
8. Esgyrn Glân
9. Ar Dân
10. Stori Drist
11. Nid Menyn yw Popeth Melyn
12. Hud a Llefrith