Gorau Cymro, Cymro Oddi Cartref?

[Aranwr]

Ers mynd i astudio yn Lloegr dwi wedi dod i hoffi'r ddihareb yma'n fawr. Dwi'n teimlo mod i'n fwy gwladgarol pan dwi i ffwrdd o Gymru nag ydw i pan dwi adre'. Yn Durham dwi o hyd yn siarad am Gymru a'r Gymraeg ac yn gwneud ymdrech i newid ymddygiad rhai o'm ffrindiau tuag at hen stereotypes. Pan ges i'n ethol yn arlywydd ar Gym Gym y brifysgol dyma oedd prif neges fy araith - ni'n Gymry oddi cartref ac mae'n wych o beth cael son am hynny wrth bawb a phob un sydd a diddordeb. Dwi'm yn meddwl dylai neb fynd yn grac atom ni am adael Cymru a mynd at brifysgolion Seisnig gan ein bod ni ry'n mor wladgarol, os nad mwy, o gael y profiad newydd hwn. Sdim teimlad gwell na canfod pobl Cymraeg mor bell o adre' a chael clonc a chan yn eu cwmni. Sdim teimlad gwell na diddori pobl drwy son am adre', y Gymraeg a Steddfod ac ati. Gorau Cymro, Cymro Oddi Cartref? Bendant, weden i!

Be chi' n feddwl?

[Mali]

Mae'n rhaid i mi gytuno efo hyn!
Dwi wrth fy modd pan dwi'n cyfarfod Cymry eraill yn y rhan yma o'r byd, neu bod yng nghwmni ffrindiau a pherthnasau pan fyddant yn dod i aros atom. Mae gen i un atgof arbennig o bedwar ohonom yn eistedd ar wal yn Campbell River un noson ym mis Awst yn disgwyl i weld y 'cruise ships' yn dod i lawr o Alaska i Vancouver. A dyna lle 'roeddem ni'n canu caneuon Cymraeg, ac yn cael mwynhâd llwyr.
Mi 'rydwi'n prynu llawer mwy o nwyddau Cymreig ers i mi adael Cymru hefyd...llyfrau , Cd's , fflagiau , crysau rygbi ayb.

[Lôn Groes]

Dwi'n credu mai mater o unfathiant ydi'r busnes 'ma o ail ddarganfod ein cenedlaetholrwydd unwaith y byddwn wedi gadael Cymru am wlad arall.

Rwy'n siwr bod anifeiliaid ac adar yn ymwybodol o'r un teimlad. 'Birds of a feather flock together' ac 'Adar o'r unlliw ehedant i'r unlle.'

Mae'r un peth yn digwydd yn Vancouver ac unrhyw dref fawr arall o ran hynny ple mae mewnfudwyr yn gwneyd eu cartref ac mewn brys i ddarganfod eu cyffelyb.

Unwaith y byddwn wedi gadael y gorlan mi rydym fel defaid ar gyfrgoll ac yn dechrau amau ein hunfathiant; mater o 'identity crisis' hwyrach.

Y peth naturiol i'w wneyd felly ydi chwilio am aelodau eraill o'r un genedl er mwyn cadarnhau y ffaith ein bod yn perthyn i rhywun ac yn aelod o'r un llwyth. Mae hyn yn gwneyd ini deimlo yn dipyn bach mwy clyd a sefydlog.

Diolch i'r drefn felly bod 'na siawns i ni'r Cymry ar wasgar gael cyfle i ddiwallu ein hunigrwydd a'n hiraeth, ac i ail ddarganfod ein cenedlaetholrwydd trwy rwbio sgwyddau efo Cymry eraill yn yr un cawl.

Ond wedi dweyd hyn mi fuaswn i'n meddwl ei fod o'n rhywbeth hollol naturiol, ac yn brofiad sy'n gyffredin i bawb ac nid jyst i ni'r Cymry.