Bowling For Columbine

[Di-Angen]

A oes unrhywun wedi gweld hwn? Michael Moore is the man.

[Gruff Goch]

Mi nes i ei weld o tra on i'n Ffrainc- ffilm dda, ddiddorol, ond roedd hi'n gorffen braidd yn wan, dwi'n teimlo. Doedd dim crynhodeb o'r holl bwyntiau a drafodwyd yn ystod y ffilm, fel bod un neges glir yngly^n a beth ddylid ei wneud i atal yr holl ladd ar y diwedd. Roedd hi i weld i fi mai'r gwahaniaeth yr oedd Micheal Moore wedi ei ffeindio rhwng America a gweddill y byd (y gwahaniath a oedd yn peri i gymaint mwy o bobl gael eu saethu'n farw yn America bob blwyddyn) oedd y panig yr oedd y cyfryngau yno'n ei greu gyda'u adroddiadau dros-ben llestri ar drais. Efallai dylai'r ffilm fod wedi canolbwyntio ar danlinellu hynny, yn hytrach na chloi drwy wneud ffw^l o Charlton Heston- gellid fod wedi gwneu hynny'n gynt.

Arwahân i hynny roedd hi'n dda iawn- roedd hi'n gwneud i mi chwerthin a phoeni am yn ail, ac mi roedd hi'n sicir yn braf gweld rhywbeth bach yn wahanol yn y sinema. Reit, dwi'n mynd allan i'r ardd i saethu caniau...

Gruff

[nicdafis]

Dim 'to. Mae'n dod i Theatr Mwldan diwedd y mis 'ma. Edrych ymlaen.

[Rhodri Nwdls]

Do, arbennig o dda, ond dwi yn cytuno ei bod hi'n gorffen heb rili gau y ddadl yn iawn. Doedd yr ateb i'r cwestiwn beth sydd yn gwneud America mor wallgo am ynnau ddim yn berffaith o bell ffordd. Dwi ddim yn credu mai'r cyfryngau a'r newyddion yn arbennig sydd yn creu diwylliant o'r fath yno, mae'n rhaid eu bod nhw'n dangos COPS yn Canada r'un fath a ma nhw fan hyn. Mae ei ddadl chydig bach yn simsan fan'na. A be oedd y 'tangent' na aeth o arni efo'r dyn camera newyddion yn LA yn dechra son am y smog? Sticia i dy bwnc.

Er gwaethaf hyn (sy'n gwynion pitw rili) mae'n grefftus yn y ffordd mae'n gosod y ddadl drwy lawer ffurf gweledol ac yn haeddu clod am ddod a'r pwnc i gynulleidfa mor fawr. Mae'r concise American history yn glasur! Mae rhywun di cymryd y baton mlaen gan Bill Hicks i ddeud rhyw wirionedd am America ( er ei fod yn fwy Mark Thomas na Bill Hicks).

[Gruff Goch]

Mae'r concise American history yn glasur!

Roedd hwnna'n wych!

Dwi'n meddwl fod rhaid i fi anghytuno efo chdi Rhodri yngly^n â effaith y cyfryngau ar y gyfradd o farwolaethau saethu. Mae'r ffordd mae'r byd yn cael ei gyfleu i ni ar y newyddion yn effeithio ar ein canfyddiad ni o sut le ydi'r byd go-iawn. Os mai oll wyt ti'n gweld ar y newyddion ydi pobl dreisgar yn gwneud drygau yna mi all o liwio dy farn di o'r gymdeithas wyt ti'n byw ynddo fo i'r fath raddau nes dy fod ti'n or-barod i a) gario gwn a b) saethu rhywun yn farw os wyt ti'n teimlo ychydig bach dan fygythiad. Y gwir amdani ydi mai'r eithriad (ac nid y rheol) ydi'r hyn sy'n cael ei ddangos ar y newyddion. Mae'r newydion, jyst fel rhaglenni eraill, yn gorfod cynnal y ffigyrau gwylio (ru'n peth ddwedodd cyfarwyddwr COPS), felly mae o fudd i'r newyddion ddangos y straeon mwy eithafol yn hytrach na'r digwyddiadau diflas arferol. Dwedodd rhywun wrtha i fod Heddlu Dyfed Powys wedi gorfod gweithredu ymgyrch o fynd o amgylch tai'r henoed yng nghefn gwlad Cymru i'w darbwyllo nhw eu bod nhw'n saff, cymaint oedd eu hofn. Sawl aelod o'r henoed cafodd eu llofruddio flwyddyn diwethaf yn ardal Dyfed Powys? Dim un.

Newyddion 6 neithiwr: 'So, are the streets of Britain getting more and more dangerous?'

Hmm...

Gruff

[Rhodri Nwdls]

Wnes i ddim dweud nad yw'r newyddion yn cael rhyw effaith ond ei fod ddim yn cael effaith yn arbennig yn fwy na phethau eraill.

Un peth mae'r ffilm yn ei brofi ydi fod America wastad wedi bod yn lle treisgar gyda hanes o othrwm a rhyfela ymysg eu gilydd mor agos yn y gorffennol pa ryfedd fod hyn yn treiddio i'r gymdeithas gyfoes.

Dwi'n credu fod gan dlodi lawer i wneud a'r peth gan fod America yn trin pobl dlawd mor gachlyd, pa ddewis sydd ganddynt ond troi i ddelio cyffuriau sydd yn mynd law yn llaw a gynnau o'i natur.

Mae'r ystadegau marwolaethau a gynnau yno yn rhywbeth ar wahan i bethau fel masacr Columbine, sy'n rhywbeth prinnach na jest gangland shooting gyda rhesymau hollol wahanol am ddigwydd. Tasa na ban ar ynnau yno falla fasa nhw heb gael gafal ar y gynnau oedd ganddyn nhw, ond yn amlwg o be sy'n digwydd y wlad yma yn ddiweddar mae pobl sydd wir eisiau gwn ac sydd mewn cylchoedd troseddol (hy deliwyr cyffuriau caled ac ati) gallan nhw gael un.