Gwyl Gynghaneddu Ty Newydd

[nicdafis]

Roedd yr <a href="http://www.cynghanedd.com/gwyl/">Wyl</a> yn wych, gyda rhywbeth ar dant pawb. Oedd tipyn o sioc yn y Talwrn ar y noson gyntaf, gyda limeric Dafydd Iwan yn cael ei guro gan ryw ypstart o Flaenau, ond bydd rhaid i chi aros i glywed (neu, i <a href="http://www.bbc.co.uk/cymru/radio/talwrn/talwrn-prif.shtml">ddarllen</a>) mwy am hynny.

Buon ni mewn gweithdy i'r "hamstars" bore dydd Sadwrn, a gafodd ei redeg gan Cynan Jones. Er syndod mawr i mi, nid fi oedd y person mwya anobeithiol yn yr holl ddosbarth, ond oedd y ras hwnnw yn agos iawn.

Yn y prynhawn, bu sesiwn trafod gwaith tri bardd ifanc, dan ofal Twm Morys a Mei Mac - oedd hyn yn ddiddorol iawn, ond yn rhy dechnegol i mi, i fod yn onest. Roedd y sesiwn canlynol yn waeth byth, yn nhermau hollti blew, ond yn ddiddorol tu hwnt yn nhermau cymdeithasegol - dadlodd y beirdd am y cwestiwn llosg: a ydy dau <b>b</b> yn wneud un <b>p</b> neu beidio. Ro'n i o blaid beth dwedodd Idris Reynolds: os ydy hi'n cynghaneddu yn bert, mae'n iawn. Ond ydy hyn yr holl bwynt?

Roedd pethau yn llacach o lawer yn y gyda'r nos (fel maen nhw'n dweud lan yn y gogledd heulog) - noson o Gynghaneddu'n Ddoniol mewn gwesty lleol.

Yn y bore, aethon ni i ddarlith Mererid Hopwood yn Saesneg. Dw i'n credu oedd hi braidd yn siomedig i weld cymaint o siaradwyr Cymraeg 'na: dim ond un person 'na oedd yn hollol di-Gymraeg.

Cawson ni ddarlith (trafodaeth, i fod, ond dw i'n credu oedd y beirdd i gyd yn flinedig ar ôl y sesiwn y prynhawn gynt) gan Myrddin ap Dafydd, am y mesurau newydd wnaeth e ddefnyddio yn ei gyfres buddugol Ty Ddewi. Wedyn, cinio arbennig, a beirniadaeth ar gystadleuaeth yr Wyl (a enillwyd gan Tudur Dylan) - arwydd o faint o'n i wedi mwynhau yw fy mod i'n bwriadu prynu'r <i>Barddas</i> nesa i ddarllen cerdd Tudur a'r eraill a gystadlodd.

Gwyl arbennig, pobl diddorol, tywydd bendigedig, a jyst rhag ofn o'ch chi'n poeni, brecwast ardderchog yn y gwesty gwely a brecwast, Glan Llifion, Cricieth.

[Hogyn o Rachub]

Son am gynghaneddu, oes un ohonoch chi wedi bod i weld Taith y Saith Sant?

Werth chweil!!!!!!

[nicdafis]

Es i i'r sioe ym Mlaenau. Da iawn, wir. Hoffwn i weld copi o gerdd Myrddin ap ynglyn â'r boi sy'n darllen y newyddion ar S4C (Dewi Lloyd, ife?) sy'n bennu bob darllediad gyda winc bach. Sa i'n credu bydd honno yn <i>Barddas</i>.

[Alys]

Roedd yn wych, wir (y 7 Sant hynny ydi (wel 6 pan welais i nhw, doedd Ifor ap G ddim yno), fedra i ddim sôn am yr Wyl Gynghanned am nad oeddwn i yno yn anffodus), debyg na fydd hanes Dwynwen yn Barddas chwaith ...

Os ddaru chi fwynhau hwnnw, beth am daith y Bechgyn Drwg?
"Nosweithiau dwyieithog unigryw o gerddi, blw^s, chwerthin a drygioni." Twm Mowys, Iwan Llwyd, Nigel Jenkins a John Barnie. Wedi teithio Americia a rhannu o Gymru, eto i'w gweld yn y Ring, Llanfrothen Nos Iau yma y 21ain o Dachwedd, a Llanfyllin Nos Sadwrn 1af o Chwefror (sut fedrwch chi aros?!). Falle yn llefydd eraill fyd, dwn i'm.

[Alys]

... ac wrth gws yw enwog Twm Morys meddai hi gyda wisp ...

[Hogyn o Rachub]

Gary. Yn cael winc