Y TALWRN - hoff gerddi

[Bimbo]

Byddai'n ddifyr gwybod pa gerddi talyrnol yw fferfrynnau Maes-e. Diddorol hefyd gweld a yw marciau'r 'Meuryn' yn adlewyrchu barn y gwrandawyr! Ga' i ddechrau gyda fy hoff gerdd i yn ddiweddar sef telyneg Osian Rhys Jones (tim Talybont), sef "Cwymp" :

Telyneg Cwymp

A wnei di, pan fo'r noson yn glir,
Lygadu'r llwybrau llaethog yn hir?

Ymhell o'r clociau rhythmig undonog
Sy'n cadw'r ddinas mewn cylchoedd anfoddog;

A theimlo bod eiliad cyn bod eiliadau
Fel oesoedd ac oesoedd yn bwrw'i iasau

Dros dy wyneb. Nes teimlo dy fodolaeth,
Mewn anadliad, dros rychwant creadigaeth,

Ac yn cynnau'n dy lygaid rhyw enedigaeth
All eisoes fod yn farw, ond pa wahaniaeth?

Ac wedi'r gwylio, a'r cydnabod,
Paid ag anghofio dy fod di'n gorfod

Cadw dy lygaid, wrth droedio dy lwybyr,
Ar dy gamau bychain, rhy fach i'w mesur;

Neu byddi di'n cwympo mor drwsgwl i'r llawr,
A'r sêr i dy ganlyn, yn y crio mawr.

Osian Rhys Jones


( mae'r diwedd yn ysgytwol ! )

[Muralitharan]

Dim ond i nodi mai aelod i Dim y Gler ydi Osian Rhys Jones. Ond mae hi'n gerdd hyfryd!

[Cowboi Morfa Nefyn]

Y gerdd sydd wedi fy swyno i dros yr wythnosau diwethaf yw un Iwan Llwyd. Mae'r darlun hiraethus wedi fy hudo'n llwyr:

Cyffro
Ar gymer tair afon ar derfyn pnawn,
lle daw'r eogiaid eto ar eu taith,
caf oedi gyda 'ngwydr hanner llawn
a gwylio'r machlud drwy olygon llaith;
wrth i'r cysgodion ledu dros y dre',
ar ambell dŷ, mewn ambell dafarn fud,
mae cyffro hen ddiwylliant gloyw'r lle
yn dal i ddal pelydrau'r haul o hyd:
â'r nos yn cau, gan daenu'i hamdo hi,
fe welais fflach dan wyneb llwyd y dŵr
a lliw fel blodau'r gwanwyn yn y lli,
pererin o'r Iwerydd pell, dwi'n siŵr,
yn dal i gredu rhywsut, â phob llam,
bod fory rhwng Sant Croix a Notre Dame*

* Dwy eglwys hynafol Kemperlé yn Llydaw, un bob ochr i'r afon.
Iwan Llwyd

[Lewis]

Faint sy'n cofio cwpled syfrdanol Ken Griffiths (Tan-Y-Groes)? :

Dim ond un all estyn llaw
A hoelion trwy ei ddwylaw.

yn syml: perffeithrwydd!

[Bimbo]

os dw i'n cofio'n iawn dyna'r cwpled gafodd ddeg marc a hanner. Ydy, mae'n hollol wych!

[Hazel]

Fy hoff cerdd:

Aberdaron


Aberdaron

Pan fwyf yn hen a pharchus,
Ag arian yn fy nghod,
A phob beirniadaeth drosodd
A phawb yn canu 'nghlod
Mi brynaf fwthyn unig
Heb ddim o flaen ei ddôr
Ond creigiau Aberdaron
A thonnau gwyllt y môr.

Pan fwyf yn hen a pharchus,
A'm gwaed yn llifo'n oer.
A'm calon heb gyflymu
Wrth wylied codi'r lloer;
Bydd gobaith im bryd hynny
Mewn bwthyn sydd â'i ddôr
At greigiau Aberdaron.
A thonnau gwyllt y môr.

Pan fwyf yn hen a pharchus
Tu hwnt i fawl a sen,
A'm cân yn ôl y patrwm
A'i hangerdd oll ar ben;
Bydd gobaith im bryd hynny
Mewn bwthyn sydd â'i ddôr
Ar greigiau Aberdaron.
A thonnau gwyllt y môr.

Oblegid mi gaf yno
Yng nghri'r ystormus wynt
Adlais o'r hen wrthryfel
A wybu f'enaid gynt.
A chanaf ô'r hen angerdd
Wrth syllu tua'r ddôr
Ar greigiau Aberdaron
A thonnau gwyllt y môr.

---Albert Evans Jones (Cynan)

[Lewis]

Am ryw reswm mae'r delyneg fach hon o eiddo Dai Jones (Crannog) wedi cydio ynof fi:

Yng nghanol y prysurdeb
A'r adeiladau lu,
A lliwiau y Gorllewin
Yn cuddio'r hyn a fu,
Does fawr o neb yn sôn am ing
A fu un waith ar sgwar Beijing.

[Pentre Eiddwen]

Rwy'n cofio clywed yffach o gwpled da unwaith ar ryw dalwrn, ond dim clem pwy yw'r bardd:

Gall llong a gyll ei hangor
Roi min ar grafangau'r mor.

Gymaint o wirionedd mewn dwy linell fer.

[Bimbo]

M ap D = bardd gorau gogledd Cymru!

[krustysnaks]

Am ryw reswm mae'r delyneg fach hon o eiddo Dai Jones (Crannog) wedi cydio ynof fi:

Yng nghanol y prysurdeb
A'r adeiladau lu,
A lliwiau y Gorllewin
Yn cuddio'r hyn a fu,
Does fawr o neb yn sôn am ing
A fu un waith ar sgwar Beijing.

Dwi ddim yn meddwl bod hwn yn dda iawn. "Yng nghanol y prysurdeb" - daeth y llinell yma o'i delyneg ddiwethaf am y Nadolig? Efallai mai "yng nghanol y tinsel a'r siopa" oedd yr ail linell...

Mae pobl yn sôn drwy'r amser am beth ddigwyddodd yn 1989 yng nghyd-destun y Gemau Olympaidd. Nid 'sgwar Beijing' mohono chwaith - Sgwâr Tiananmen.