Clwb Llyfrau

[Siani]

Oes diddordeb gyda rhai ohonoch chi mewn clwb llyfrau ar lein? Penderfynu ar lyfr penodol i'w ddarllen, pennu dyddiad i'w orffen, wedyn ei drafod?

[Alys]

Mae'n syniad da mewn egwyddor, a dweud y gwir 'dan ni newydd ddechrau clwb o'r fath yn lleol, roedd y cyfarfod 1af yn ddiddorol, wnathon ni drafod 'Siabwcho' Marged Lloyd Jones. Mewn gwirionedd, mae'n well gen i drafod "go-iawn" yn hytrach nag ar-lein, pawb yn gweld fy sylwadau twp ar goedd, ayb., ond gan fod Abertawe yn ddigon pell ... dwi'n fodlon rhoi cynnig arni, os bydd gan bobl eraill diddordeb, yn arbennig am ei fod yn ffordd i gael darllen pethau sydd wedi'u hargymell gan bobl eraill, efallai na fyddwn i wedi'u darllen fel arall.

[Siani]

Rwy'n cytuno gyda ti, Alys. Ro'n i'n arfer bod yn aelod o glwb o'r fath yn lleol, ond mae wedi chwalu erbyn hyn. Y peth rwy eisiau fwyaf, rwy'n credu, yw argymhellion am lyfrau ac awduron sy'n newydd i mi (diolch am awgrymu Iain Banks - rwy'n mynd i drio "Wasp Factory" yn fuan). Drwy'r clwb lleol rwy wedi darllen rhai pethau fyddwn i byth fod wedi eu hystyried fel arall - yn enwedig y cyfieithiadau, gweithiau Eidaleg, Almaeneg, Rwsieg... Gobeithio bydd diddordeb gydag eraill, i drafod yn ffurfiol neu'n anffurfiol.

[nicdafis]

Byddai diddordeb 'da fi, ond i fod yn realistic does dim lot o amser 'da fi i ddarllen stwff i'r coleg heb sôn am bethau eraill. Wel, alla i stopio treulio cymaint o'm amser ar y we, ond dydy hynny ddim yn debyg

Pasiais i dy syniad ymlaen at restr postio "WriteWelsh" ond ar y pryd o'n i'n meddwl ot ti'n sôn am lyfrau yn y Gymraeg yn unig, felly dw i wedi rhoi pobl off falle (rhestr i ddysgwyr yw e). Sgwenna atyn nhw 'to....

[nicdafis]

O'r gorau, wedi wneud hynny.

Beth am osod <i>The Wasp Factory</i> fel llyfr i'w drafod? (Dw i'n credu bod copi 'da fi o hyd.) Neu, casglu grwp bach o awgrymiadau a gosod pôl piniwn?

[Alys]

Mae'r Wasp Factory yn syniad eitha da, mae'n hen bryd imi ei ail-ddarllen.
Ond beth oes rhaid iti ddarllen ar gyfer y gwaith coleg, rhywbeth diddorol? (Gan nad oes neb sy ddim yn hyderus yn darllen yn y Gymraeg wedi mynegi diddordeb hyd yma) Byddai hynny'n golygu nad oes rhaid iti wneud gormod o waith darllen ychwanegol, a chyflwyno pethau newydd i bobl eraill, siawns.

[nicdafis]

Ar ran nofelau, bydda i'n darllen <i>Traed Mewn Cyffion</i>; <i>Y Pla</i>; <i>Cadw Dy Fydd, Brawd</i> ac <i>Un Nos Ola Lleuad</i>. Mae'n bosib mod i wedi anghofio rhywbeth.

[Siani]

Rwy'n gwybod yn iawn am brinder amser. Rwy yma nawr pan ddylwn i fod yn ysgrifennu adroddiad (un o 'nhactegau osgoi!)

Ar restr Nic, yr unig un dw i ddim wedi ei ddarllen yw "Y Pla" - un o'r nofelau 'na rwy wedi bwriadu eu darllen "rywbryd". Rwy wedi darllen sawl peth dw i ddim wedi cael y cyfle i'w drafod yn iawn - byddwn i'n hapus iawn yn trafod "Un Nos", "Traed Mewn Cyffion", neu "Cadw dy Ffydd".

[Alys]

Yn hollol Siani! Dw inna yma pan ddylwn i fod yn gweithio!
Yr unig un ar restr Nic dwi ddim wedi'i ddarllen, rhaid cyfadde, ydi Traed mewn Cyffion, nofel dwi'n gwybod yn cael ei hysytyried yn glasur ac un dwi wedi bod yn bwriadu ei darllen ers talwm. Byddwn inna'n fodlon trafod unrhyw o'r gweddill hefyd (dwi ar fin ailddarllen Cadw dy ffydd Brawd, wnes i ei fwynhau'n llawer y tro cyntaf, ond methu cofio fawr ddim heb yr awyrgylch!) Mae'r Pla yn werth ei ddarllen, un o'm hoff lyfrau.
Ond rwan, ble i ddechrau hefo 'trafodaeth'??

[Siani]

Wyt ti'n mynd i Dy Newydd, Alys? (clywais i bod Owen Martell yn gwneud cwrs yno) Mae'r lle 'na'n wych - ond mae prinder arian yn creu problemau iddyn nhw, clywais i. Trueni. Maen nhw'n gwneud gwaith da.